ORANJESTAD – Dialuna mainta, Minister di Husticia y Asuntonan Social sr. Rocco Tjon, tawata presente na Hyatt Place, pa un momento historico, caminda a inicia e opleiding den cuadro di e “Arubaans Wetboek van Strafvordering” nobo. Aruba lo ta e prome pais den Reino cu lo laga e ley aki drenta na vigor 1 di maart 2024, esaki despues cu Parlamento di Aruba a aproba e ordenansa nacional na 2020.
Pa combati criminalidad ta importante pa crea condicionnan adecua pa asina e cadena hudicial por actua y responde segun e expectativanan cu e comunidad tin di nan. Pa e motibo aki, e ta hopi importante pa inverti den e cadena hudicial, pa asina percura y garantisa cu e personal tin e recursonan y materialnan adecua, pero tambe cu organisacionnan por ta mas resiliente pa por funciona den e mundo di criminalidad cu ta cambia constantemente.
Mas aun, teniendo na cuenta cu criminalidad no ta para, pero ta sigui desaroya, e ta importante pa percura pa e base huridico ta adecua, pa asina e ekipo investigativo por eherce nan trabou optimalmente, cual hustamente e “Wetboek van Strafvordering” nobo ta percura pa haci.
E “Wetboek van Strafvordering” nobo ta haci cu e ley ta bira mucho mas comprendibel pa nos profesionalnan den e cadena hudicial pero tambe pa nos ciudadanonan. Tambe e ta percura pa e cadena hudicial por funciona optimalmente, y combati otro tiponan di criminalidad cu ta desaroyando. Pues, e ley di procedimiento penal di pais Aruba, lo bay ta mucho mas miho organisa pa atende cu e situacion actual y di futuro.
Pa e motibo aki, durante e “Justitieel Vierlanden Overleg”, entre paisnan den Reino a tuma e decicion pa inicia e proceso y laga e ley aki drenta na vigor, como e prome pais den Reino. E ley aki ta brinda e instancianan hudicial mas herment pa atende cu criminalidad, na mes momento ta tene cuenta tambe cu derechonan di victimanan y detenidonan.
Den consulta cu Departamento di Legislacion y Asunto Huridico (DWJZ), a palabra pa e “Wetboek van Strafvordering” nobo aki por drenta na vigor dia 1 di maart 2024.
Na aña 2013, e comision encarga pa revisa nos “Wetboek van Strafvordering” a propone un cambio di ley na e diferente Ministernan di Husticia di Reino. E ley aki tawata practicamente cla pa ser presenta na e diferente Organonan Consultativo (Raad van Advies). Consecuentemente, Curacao y St. Maarten a presenta e ley na nan Organonan Consultativo na aña 2014 y 2015. Sinembargo, Gabinete Eman I y II no a wak e importancia den un cambio di ley di e magnitud aki y no tawata te cu aña 2018 cu ex Minister di Husticia, Sr. Andin Bikker, a presenta e ley na nos Organo Consultativo (Raad van Advies) cual ley a ser aproba den Parlamento di Aruba na 2020.
Tumando den consideracion cu nos leynan mester ta den concordancia cu e otro paisnan den Reino a tuma e “Wetboek van Strafvordering” di Hulanda como punto di salida pa modifica y adapta nos ley di procedimiento penal, teniendo semper na cuenta e diferencianan den un comundidad manera di nos y esun di Hulanda. Además, un gran parti di e cambionan den e ley ta basa riba sentencianan di Corte Europeo pa Derechonan Humano, otro leynan y tratadonan internacional.
E cambionan di mas grandi lo ser trata durante e opleiding aki caminda cu den cuater dia di sesion, durante un transcurso di dos siman, e docentenan di Universidad di Aruba, hunto cu un fiscal di nos Ministerio Publico lo repasa e “Wetboek van Strafvordering” nobo aki cu tur 205 participante pa asina duna nan un bista di con e ley di procedimiento penal lo bay mustra na aña 2024.
E participantenan ta consisti di miembronan di Cuerpo Policial, Ministerio Publico, Corte Comun di Husticia, Landsrecherche, Veiligheidsdienst, Reclassering, Departamento di Asuntonan Social, Koninklijke Marechaussee, Abogadonan, y demas stakeholders den e cadena hudicial. Esaki ta brinda un oportunidad pa por tin intercambio di idea, dialogonan proactivo, asina mehorando tambe e cooperacion entre e diferente organisacionnan den e cadena hudicial.
Nos ta gradici, Universidad di Aruba, Ministerio Publico, Corte Comun di Husticia, Cuerpo Policial, y demas representantenan di Ministerio di Husticia y Asuntonan Social, pa nan esfuerso y cooperacion den e realisacion di e opleiding importante aki.