Siman pasa diasabra Minister Maduro di Cultura tabata presente na e di cinco ‘Fiesta Tipico di Bario’ organisa pa Fundacion Union di Tipiconan Rubiano (UTR) na Bubali Sport Club. UTR a bin ta organisa e fiesta tipico aki na varios Centro di Bario cu sosten di, entre otro, UNOCA, pa asina mantene nos folklore bibo y traspasa esaki pa e generacionnan mas hoben.
A honra dos baluarte cultural
Durante e evento aki a toca Minister Maduro di Cultura e honor di brinda un reconocimento na dos Baluarte Cultural cu a duna un tremendo contribucion na nos musica tipico. Ta trata di sr. Tommy Figaroa y sr. Alejandro ‘Patan’ Farro. Cada un baluarte a cuminsa na edad hopi jong y a sigui desaroya nan pasion pa nos musica tipico. Tommy a versa su mes riba harpa y Patan a deleita nos pa añas largo cu su Cah’i Orgel El Diamante. E mandatario a repasa e carera musical di cada baluarte, pa despues presenta nan cu un bunita plakaat pa reconoce nan talento y pasion pa nos musica tipico.
Ban sigui apoya loke ta di nos
Minister Maduro di Cultura ta gradici Fundacion UTR pa e bunita iniciativa pa tene nos cultura di musica tipico bibo. E mandatario ta extende un invitacion na Pueblo pa ban sigui apoya loke ta di nos. Musica tipico ta di nos, y awor cu UTR hunto cu UNOCA ta trece esaki den bario, ban probecha pa brinda sosten cu nos presencia. Por ultimo, Minister Maduro ta felicita Bubali Sport Club cu nan 80 aniversario y ta gradici nan pa contribui cu UTR pa asina nos musica tipico por rezona tambe den Bubali.
