Home » Minister Maduro di Finansa ta informa: ARUBA DEN PERSONA DI SR. ANGELO BRETE DIRECTOR DI FIU ARUBA TA ASUMI E PRESIDENCIA DI CARIBBEAN FINANCIAL ACTION TASK FORCE PA AÑA 2023-2024

Minister Maduro di Finansa ta informa: ARUBA DEN PERSONA DI SR. ANGELO BRETE DIRECTOR DI FIU ARUBA TA ASUMI E PRESIDENCIA DI CARIBBEAN FINANCIAL ACTION TASK FORCE PA AÑA 2023-2024

Na november Aruba lo ta anfitrion di e Reunion Plenario di CFATF

by Admin
0 comment 101 views

Recientemente durante e Reunion Ministerial di Caribbean Financial Action Task Force (CFAFT) na Miami a keda dicidi cu Aruba den persona di sr. Angelo Brete director di FIU Aruba lo asumi e presidencia di CFATF pa aña 2023-2024. Di e manera aki Aruba ta bolbe tuma un posicion di liderazgo di e organo regional di Financial Action Taskforce (FATF) cu ta contribui na implementa e maneho pa preveni y combati labamento di placa, financiamiento di terrorismo y financiamiento di proliferacion di armanan di destruccion masivo. Minister Maduro di Finansa ta felicita y ta desea sr. Angelo Brete hopi exito como e ‘incoming chairman’ di CFAFT. E mandatario tin tur confiansa cu sr. Brete lo sa di representa Aruba dignamente y hiba acabo e agenda di colaboracion na bienestar di e paisnan miembro di CFATF.

Aruba den posicion di liderazgo den CFATF
CFATF como un di e 9 organonan regional di e organo global Financial Action Task Force (FATF) a nace den un reunion cu a tuma lugar na Aruba den aña 1990 y despues CFATF a keda estableci pa medio di e declaracion di Kingston, na Jamaica na aña 1992. Aruba ta un di e ‘founding partners’ di CFAFT cu atrobe ta tuma un posicion den liderazgo di e organo. E presidencia actual lo pasa di Cayman Islands pa Aruba den persona di sr. Angelo Brete di FIU Aruba y e vice presidencia lo pasa di Aruba pa Jamaica.

Aruba ta comprometi pa salvaguardia integridad financiero
Ta importante pa menciona cu na september di aña 2021, Aruba a pasa door di un proceso rigoroso di evaluacion mutuo di CFATF y danki na e trabou excepcional di diferente instancia local, manera Departamento di Asuntonan Legislativo, Ministerio Publico, Banco Central di Aruba y Financial Intelligence Unit di Aruba, nos Pais a logra di haya un bon resultado. Te ainda ta solamente Bermuda y Aruba ta e dos paisnan den nos region cu a logra un bon evaluacion di CFATF. Esaki ta prueba cu Aruba ta comprometi na salvaguardia e integridad y reputacion di e sistema financiero di nos Pais. Door di asumi e presidencia di CFATF pa e periodo 2023-2024, Aruba ta bolbe posiciona su mes como un Pais lider den Caribe cu ta comprometi pa salvaguardia e integridad financiero den nos region.

Aruba ta boga pa fortifica colaboracion entre Paisnan den Caribe
Pa e aña di su presidencia, Aruba a scoge e tema ‘ ‘Strengthening our Caribbean Bond through AML/CFT/CPF compliance’ pa mustra riba e importancia di colaboracion entre e Paisnan den Caribe pa asina por logra e cumplimento necesario cu recomendacionnan di FATF pa por mantene e integridad di e sistema financiero den Caribe. Aruba lo hasi un yamado na paisnan cu ta fuerte riba cierto tereno, pa sostene otro paisnan cu mester di apoyo. Durante di transcuro di aña aki mes, Aruba a duna apoyo na Belize y nos intencion ta pa brinda apoyo tambe na Corsou y St. Maarten cu pronto lo experencia nan evaluacion mutuo.

Aruba ta anfritrion di e di 57 reunion plenaria di CFATF
E Presidencia di Aruba pa CFATF, ta trece cune cu Aruba lo ta anfritrion di e di 57 Reunion Plenaria di CFATF na november proximo. Pa e reunion aki mas cu 250 delegado di e paisnan miembro lo ta di bishita na Aruba pa asisti na e reunionnan importante aki, den cual lo trata diferente topico incluso e resultado di e evaluacion mutuo di dos pais.

You may also like