Home » Polis no a haci investigacion completo Homber haya cu 15,9 gram di cocaina den auto declara liber

Polis no a haci investigacion completo Homber haya cu 15,9 gram di cocaina den auto declara liber

by Admin
0 comment 297 views

ORANJESTAD – Corte di Husticia a trata e caso penal cu Ministerio Publico a cuminsa contra e homber C.E. kende ta wordo acusa di tabatin cocaina den auto. Tabatin un desaroyo interesante durante tratamento caminda a resulta cu Polis no a haci investigacion completo.

ARUBA NATIVE por a compronde cu Hues ta comparti observacion di abogado mr. Griffith, kende a señala cu Polis no a interoga e ruman muher di C.E. cu tabata den auto y tampoco no a check fingerprint riba e tas. Asina lo por a saca afor si loke C.E. a bisa Polis ta berdad. C.E. a bisa cu e droga no ta di dje sino di un amigo cu el a duna lift. Esey a causa cu Hues a declara C.E. liber.
DROGA DEN AUTO/I

Corte di Husticia a trata e caso penal cu Ministerio Publico a cuminsa contra e homber C.E., kende ta wordo acusa cu riba 16 Februari 2023, e tabatin droga den su auto.

Abogado mr. Griffith su so a presenta den Corte. El a bisa Hues cu doño di trabao no kier a duna C.E. liber. El a mustra Hues e carta di doño di trabao. Fiscal a dicidi di trata caso tog. Tambe Fiscal a exigi pa ehecuta e castigo condicional cu tin pasobra C.E. a haci e delito durante su tempo di prueba.

Ta asina cu dia 16 Februari 2023 tabatin control di Polis. Agentenan di Polis a para e auto den cual tabatin C.E. y su ruman muher. Bou di e asiento a haya un sakito cu purio di cocaina y Piedra. En total esaki a pisa 15,9 gram. C.E. a bisa e agentenan cu e droga no ta di dje sino di un tal Jeffry cu el a duna un lift. C.E. no sa e fam di Jeffry.

FISCAL

Fiscal ta haya cu C.E. no a splica suficiente tocante Jefrry y pesey ta haya cu C.E. ta responsabel. Pa cu e castigo, Fiscal a bisa cu ta trata di 15.9 gram di cocaina. Cocaina ta hopi malo pa salud di hende. E ta causa adiccion. Fiscal a sigui bisa cu C.E. no ta un desconoci pa Polis. E tin un carchi di castigo di 13 pagina. El a bisa Hues cu C.E., un rato despues cu el a wordo laga liber, el a wordo haya cu droga. Fiscal ta considera C.E. un recidivista. El a exigi 10 ora di trabao pa comunidad y si no cumpli 5 dia sera. Na opinion di Fiscal, durante C.E. su tempo di prueba, el a haci delito. Fiscal a exigi 60 ora di trabao pa cumunidad extra. En total e castigo a bira 70 ora di trabao. E tempo di prueba ta 3 aña.

ABOGADO

Mr. Griffith a bisa Hues cu den oranan di anochi a para C.E. pa control preventivo. A haya 15.9 gram di cocaina. C.E. a bisa cu e droga no ta di dje sino Jeffrey cu el a duna un lift. C.E. no tabata sa cu Jeffrey tabatin droga cun’e y a pon’e bao di asiento di C.E. Na opinion di abogado, Fiscal no ta kere e declaracion di C.E. Pakico no a haci mas investigacion. Por a puntra e ruman muher di C.E. cu tambe tabata den auto. Tambe por a busca fingerprint riba e tas den cual a haya e droga. E abogado ta di opinion cu lamentablemente no a haci mas investigacion. Door cu e ta un conoci di Polis, a hay’e culpable. No por bisa cu intencional C.E. tabatin e droga den auto. E abogado ta haya cu mester declara C.E. liber. El a mustra cu C.E. ta trahando duro y tin trabao ya 9 luna caba. Reclasering den su raport ta papia hopi bon di C.E. y cu el a cambia di actitud. E ta trahando duro. E ta pidi Hues pa declara C.E. liber.

SENTENCIA

Hues a sera tratamento di e caso y a dicta sentencia di biaha. Hue a bisa cu e droga a wordo haya bou asiento di auto. E ta mustra cu C.E. ta den posecion di droga. C.E. a bisa cu tabatin un amigo sinta su tras cu el a duna lift. Hues ta comparti punto di bista di mr. Griffith. El a bisa cu C.E. a bisa cu su ruman muher tabata den auto pero Polis no a haci mas investigacion. Hues ta haya cu Polis por a interoga e ruman muher. Tambe cu Polis por a busca fingerprint riba e tas pa confirma si e droga ta di C.E. of no. Hues ta conclui cu ta declara C.E. liber.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio