Oranjestad, Diabierna mainta Prome Minister Evelyn Wever-Croes hunto cu Parlamentario Alvin Molina, a bishita St. Paulus School na San Nicolas pa mira con e docente y alumnonan ta duna y haña les cu e “chromebooks” nobo cu nan a gana cu e proyecto di Edutech.
Prome Minister a indica cu St. Paulus School ta un scol cu tin hopi aña caba canando e caminda pa digitalisacion, y a tuma e oportunidad di participa na e proyecto di innovacion di Edutech pa gana e oportunidad pa haya chromebooks pa klasnan 3 y 4. Cu un proyecto diferente, St. Paulus School a logra gana, ricibiendo asina un total d 50 chromebooks pa e klasnan. Esaki sigur a trece un cambio radical pa loke ta e participacion di e muchanan den klas. Por nota cu e muchanan ta sumamente entusiasma cu e sistema nobo aki, y ta duna mas di nan parti durante les. E docentenan tambe ta contento, mirando cu e disponibilidad di e chromebooknan aki ta facilita e manera pa duna les, y ta crea un ambiente ameno.
Durante su bishita, Prome Minister tambe a toca e tema di siguridad, y a reitera e importancia pa educa e muchanan di e peliger cu ta existi, na momento cu nan subi Google pa busca informacion. Esaki sigur ta un tema St. Paulus School ya ta tene cuenta cu ne, mirando cu nan ta siña e muchanan e importancia di tin un password y di mantene secreto, pa asina evita cualkier persona por “hack” den nan sistema.
Tambe, Prome Minister a expresa di ta sumamente orguyoso pa mira e caminda cu St. Paulus School ta bin ta canando pa añanan caba pa loke ta innovacion, y ta contento cu e scol a kere den e proyecto di Edutech. Danki na nan participacion, y cu nan a gana, Gobierno por a yuda nan cu e materialnan cu tanto nan tabata desea. E 50 chromebooknan aki lo haci un diferencia sigur den participacion di cada mucha, cu e resultado di termina nan aña escolar exitosamente. Prome Minister ta felicita St. Paulus School, e cabesante, tur docente y alumno, y ta gradici Futura pa haci esaki posibel, cumpliendo asina cu soño di un scol mas.
