Diasabra awor lo tin e di dos Baki den Bario na Stadion Nadi Croes & Crismo Angela na Santa Cruz. Lo tin baki pa diferente tipo di desperdicio presente den e parkeo di e stadion for di 7‘or te 11‘or di mainta. Ministerio di Naturalesa ta pidi tur ciudadano cu lo haci uzo di Baki den Bario pa tene cuenta cu e orario stricto aki ya cu ta teniendo cuenta cu schedule di facilidadnan di procesamento di desperdicio.
E prome Baki den Bario dos siman pasa na San Nicolas a haya un gran acohida di pueblo di pariba. Ciudadanonan a haci bon uzo di e oportunidad pa separa y trece nan desperdicio rond di cas liber di costo. Den total a colecta 20 baki di desperdicio mescla, 1 baki di desperdicio di construccion, 6 baki di desperdicio di metal, 1 baki di e-Waste y 6 baki di Green Waste. A keda demostra cu nos ta dispuesto como pais pa aporta na un maneho di desperdicio sostenibel. Pues e separacion di desperdicio ta yuda cu su procesamento y ta disminui e contaminacion di nos naturalesa.
Minister di Naturalesa, Sr. Ursell Arends ta invita henter pueblo di Santa Cruz pa pasa e diasabra aki na Stadion Nadi Croes & Crismo Angela. Algun cos pa considera ta pa prepara y separa tur e desperdicio cu kier trece, tene na cuenta cu lo tin fila di auto y pa ta na tempo. Bureau City Inspector ta encarga cu e supervision y control di fluho pa e actividad di Baki den Bario. Tambe ta recorda cu lo tin baki pa desperdicio mescla, Green Waste (mata), e-Waste (electronica), desperdicio di construccion y desperdicio di metal.
Baki den Bario ta forma parti di e campaña nacional ‘Limpi Limpi’ cu tin como meta e cumplimento cu APV (Algemene Politie Verordening), un Aruba limpi y e separacion di desperdicio. Baki den Bario lo ta tumando luga te cu dia 16 di december na diferente districto di nos isla. Pa e siguiente fechanan y pa mas informacion tocante e tipo di desperdicio cu ta wordo acepta bishita trashtocasharuba.org/limpilimpi.