Na e momentonan aki un punto di discusion ta e ley di consenso yama Rijkswet Aruba Financieel Toezicht cu nos conoce como RAft. Un concepto di ley cu desde juli 2020 den pleno pandemia a trece hopi rabia y discordia con esaki a ser presenta den momentonan mas critico di salud y financiero di pais Aruba. E proceso con esaki a ser encamina, mescos cu ta e caso di COHO, a ser condena y cuestiona durante reunion di IPKO no solamente pa Parlamento di Aruba so, sino tambe door di e mesun Parlamentarionan Hulandes. Esaki no solamente a wordo registra den e afsprakenlijst di mei 2022 na Sint Maarten, pero tambe den e propio verslag di Parlamento di Aruba cu a bay dia 20 di mei 2022 pa Gobierno di Reino Hulandes cu te dia di awe no a wordo contesta. Den e parti 1 di e articulo mi a elabora riba procedura di un ley di Reino y den e parti aki mi lo elabora riba riba nos propio verslag entrega dia 20 mei 2022.
Dicon no ta contesta y ta insisti pa Parlamento duna su aprobacion sin haya contesta?
Bou di un presion enorme di tempo Parlamento di Aruba mester a entrega su preguntanan den forma di un verslag dia 20 di mei 2022, di cua te cu dia di awe nos no a ricibi contestacion. Sigur como Parlamentario mi ta puntra mi mes dicon Hulanda ta keda exigi pa Parlamento duna su aprobacion pa asina por sigui e proceduranan mientras cu e procedura, cu ta hancra den nos Statuto, ta exigi cu e preguntanan critico di e Parlamentarionan di Aruba como di Tweede Kamer mester wordo contesta. Mi lo duna algun ehempel di puntonan cu a bin dilanti den e verslag cu nos lo kier wak cambia si kier papia di un ley di consenso.
Un di nos puntonan cu sigur nos kier wak cambio ta cu ta duna Aruba un periodo mas largo di por paga bek y den cuadro di nos situacion fianciero lo ta prudente tambe pa duna nos un periodo di gracia pa cuminsa paga. Otro punto ta pakico nos no ta haya mesun trato cu Corsou y Sint Maarten a haya na october 2010 ora nan a bay pa un ley di consenso di Reino. Corsou y Sint Maarten a haya inscripcion na interes abao pa nan debenan y despensacion pa tur nan debenan cu tabata alrededor di 3 biyon florin.
Den nos caso nos ta pidi pa incorpora den e ley cu nos debenan internacional tambe por conoce un inscripcion na interes abao, cu lo nifica cu nos lo por salba rond 70 a 80 miyon florin pa aña na interes so di e MEGA DEBE di Mike Eman. E cambio aki, cu lo scapa nos hopi na interes no mester bay solamente pa paga debe, pero un gran parti tambe mester bay den inversionnan cu ta hopi necesario den nos pais. Mi persona ta pensa riba un reparticion di 50%-50% lo ta uno cu nos por acepta. Banda di esaki mester bin un articulo unda cu despues di 3 aña ta evalua e ley aki y si ta necesario pa haci cambionan pa asina e por funciona optimalmente y preveni loke ta pasando cu RFT, unda cu tin rapportnan cu ta indica cu e ley aki ta e matando economia di Corsou y Sint Maarten y cu e mester wordo modifica.
Un otro punto cu mi no ta di acuerdo cu ne y cu mester wordo modifica ta e salida di e ley cu den e concepto no ta bon defini. Den e concepto actual ta exigi pa bin cu un cambio constitucional cu ta surpasa autoridad Hulandes. Cu e punto aki tambe Hulanda ta actuando di mala fe paso nan sa cu e clausula aki hamas por ser logra den bista di con politikeria ta ser hunga na Aruba y unda cu como ehempel ta e cambio constitucional di Ombudsman cu no por a ser logra door di mester di 2/3 voto. Den e clausula di salida mester bin un punto unda cu si Aruba como pais haya un banco cu por financia e debe di Afl. 916 miyon na un porcentahe cu ta miho cu e 6 a 8 %, cu awo ta mane guillotina riba mesa, cu Hulanda ta copera pa Aruba por haci esaki. Finalmente, na momento cu Aruba di paga e debe e rijkswet ta caba y e supervision ta transforma su mes den un ley local manera nos a bin ta conoce como e LAft.
Mi ta kere ta boluntad mester tin y sigur si nos kier papia di un ley di consenso, Hulanda mester cuminsa duna oido y tene tuma na serio e puntonan cu pa Aruba ta importante y asina yega na otro. Nos como pais siguramente ta buscando un miho acuerdo cu lo beneficia nos pais y di otro banda tin Hulanda cu lo ser garantisa cu e ta haya su placa bek. Pues mi ta hasi apelacion na ambos Gobierno pa sinta cu cabes frieuw y repasa un biaha mas e preguntanan haci den e verslag di Parlamento y busca e consenso na bienestar di Reino Hulandes.