Home » Parlamentario drs. Mervin Wyatt-Ras: Minister Arends a instrui coalicion pa vota contra mocion pro SABA

Parlamentario drs. Mervin Wyatt-Ras: Minister Arends a instrui coalicion pa vota contra mocion pro SABA

by Admin
0 comment 220 views

Esey ta loke e parlamentario di Partido di Pueblo Arubano (AVP) a indica cu a sosode e siman aki durante e reunion publico pa tratamento di presupuesto supletorio 2023 y cu e ta considera importante pa pueblo ta na altura di dje.

Fuera di cu a obliga Parlamento di Aruba pa trata un presupuesto supletorio cu no ta basa riba realidad, manera cu Raad van Advies mes a indica y adverti, Gabinete Wever-Croesdi un forma fragante ta instrui esunnan cu lo mester ta representante di pueblo, con pa vota riba mocionnan.

Pa Wyatt-Ras no tin duda cu gobierno kier sconde solo cu un dede e situacion real di nos isla, esta cu door di tur medida a afecta e ciudadano mas humilde, mescos cu e comerciante chikito. “Ki bal bo tin progreso den entrada, pero pueblo no tin pan pa pone riba mesa, ta kita nan awa, nan coriente, no por paga pa gasolin pa hiba mucha scol, ni paga mas na gasto di scol, uniform cu a bira mas caro, etc.” e parlamentario a expresa na prensa.

Den un intento pa sali na defensa di e ciudadano comun y specificamente di un grupo vulnerabel manera ta nos grandinan, AVP a presenta un mocion durante e reunion publico ya cu no por sigui wak con Minister Ursell Arends ta duna splicacion di e disputa cu ta hiba cu SABA riba e suma di subsidio. E caso sumario ta afectando mientrastanto e pago na trahadonan y henter e maneho di e entidad.

Wyatt-Ras: “P’esey AVP a presenta un mocion pa entrega suma necesario pa cumpli cu empleado, cu ta coriendo den atraso, ademas di loke ta necesario pa loke gobierno mes ta exigi di SABA, por ehempel un auditing di e bukinan cu ta costa 125 mil florin pa aña”, sin conta ainda e cuenta anual y loke esey ta costa. “E intencion di AVP ta pa garantisa cu e cuido di nos grandi ta uno cualitativo,” e parlamentario a afirma.

Lamentablemente e minister mes a tuma rienda di e reunion, y manera custumber di e coalicion aki, a pidi parlamento pa no apoya e mocion. Peticion cu, manera tabata di spera, parlamentarionan di fraccion MEP y RAIZ a cumpli cabalmente.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio