Home » MINISTER ENDY CROES TA FELICITA E 62 AGENTENAN POLICIAL CU A RICIBI NAN DIPLOMA

MINISTER ENDY CROES TA FELICITA E 62 AGENTENAN POLICIAL CU A RICIBI NAN DIPLOMA

Tres diferente klas a ricibi diploma Basico di Polis,MBO y Hoger Kader Opleiding (HKO) 

by Admin
0 comment 186 views

 

 

ORANJESTAD: Diabierna mainta, den un esfera ameno rondona pa famia- y coleganan 62 agente policial a ricibi nan diploma. Minister Endy Croes a representa colega Minister Rocco Tjon na e ocasion special aki. Ta trata aki di 62 agente policial di tres diferente klas cu a ricibi diploma Basico di Polis, estudio policial nivel cuater (4) di MBO y Hoger Kader Opleiding (HKO). Minister Endy Croes hunto cu altocomisario Sr. Ramon Arnhem y hefe di Scol di Polis Sra. Jeannette Richardson – Baars a otorga diploma na e agentenan policial. Minister Endy Croes a hiba palabra e mainta aki unda a subraya e echo cu si mira con criminalidad ta desaroya  ta importante pa nos percura cu Cuerpo Policial Aruba como organisacion por cumpli cu e demanda cu e desaroyo aki ta trece cu ne. P’esey conforme e plan di maneho di Ministerio di Husticia e punto primordial ta pa keda inverti den e capital humano y inverti den nos agentenan policial. Door di crea condicionnan di trabou adecua, percura pa tin e materialnan necesario, pero tambe sigui expande conocemento door di haci inversionnan valioso den educacion. Educacion ta e motor di un pais y cu e inversionnan aki pueblo por ta trankil y tin e confiansa cu Cuerpo Policial Aruba ta keda garantisa e siguridad pa henter nos comunidad. Cuerpo Policial Aruba ta memey di un reorganisacion y esaki ta sumamente importante mirando e diferente fenomenonan di criminalidad cu ta wordo señala, entre otro, e “criminaliteit beeld analise”  cu recien a wordo emiti. Pa e proceso aki por cana bon e liderazgo di cada un agente policial ta asina importante. Liderazgo personal paso na final di dia imagen di Cuerpo Policial Aruba ta wordo influencia den e bon sentido y kisas menos positivo door di actitud y liderazgo. Cada un agente policial ta un lider riba nan mes y esey ta fortifica Cuerpo Policial Aruba. Como organisacion Cuerpo Policial Aruba a caba di celebra 37 aniversario. Na esnan mas jong, boso ta forma parti di un cuerpo dinamico cu ta brinda un carera bunita y na esnan mas experencia e ta den boso man hunto cu alto mando pa percura pa e cuerpo aki por celebra hopi aña mas y sigui gosa di e respet tanto local como internacional. Pa conclui, den nomber di Gobierno di Aruba, Minister Endy Croes a felicita e 62 agentenan policial cu a ricibi nan diploma. Masha pabien y hopi exito!  

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio