Home » Minister Dangui Oduber TABATA TIN UN BON ENCUENTRO CU REPRESENTANTENAN DI MINISTERIO VWS DI HULANDA

Minister Dangui Oduber TABATA TIN UN BON ENCUENTRO CU REPRESENTANTENAN DI MINISTERIO VWS DI HULANDA

by Admin
0 comment 204 views

ORANJESTAD – Diamars merdia Minister di Turismo y Salud Publico sr. Dangui Oduber a ricibi bishita di sr. Herbert Barnard y sr. Vincent Storimans representante di VNO na bestuurskantoor. Sr. Barnard ta director di e programa di Cuido y Hubentud (Zorg & Jeugd) di Caribe Hulandes den e Ministerio di “Volkgezondheids, Welzijn en Sport”(VWS) na Hulanda y sr. Voncent Storimans ta representante di VNO na Aruba. E bishita aki ta uno importante pa continua e cooperacion a largo plaso cu tin entre e dos ministerionan.
E Ministerio di VWS y Ministerio di Turismo y Salud Publico tin pa tempo largo un relacion di cooperacion constructivo riba nivel gubernamental, cual ta dirigi riba e tereno di Regulacionnan Intenacional di Salud (International Health Regulation). Durante e temporada di pandemia e cooperacion entre e Ministerionan a crese, ora participacion di e conseheronan riba diferente tereno y temanan riba ambos nivel nacional y regional a tuma lugar. E bon comunicacion cu a wordo estableci y tambe e esfera colegial cu tabata tin durante e periodo aki a contribui pa tin un cooperacion efectivo y exitoso. Ministerio di Turismo y Salud Publico sigur ta aprecia e cooperacion aki y lo sigui apoya Ministerio di VWS.
Den cuadro di e cooperacion aki, lo tene consultanan regularmente riba nivelnan oficial como nivelnan gubernamental entre e 4 paisnan den Reino. Den e ultimo Vierlanden Overleg a identifica 9 topiconan clave di cooperacion. Den cual Aruba ta lidera 3 cual ta preparacion di pandemia, prevencion den salud, structura di calidad di cuido y acreditacion pa profesionalnan den cuido y institucionnan. Adicionalmente Curacao ta liderando e topico nobo cual ta ensera e efecto cu e pasado di esclavitud tin riba diferente problemanan di salud asocia cu estilo di bida.
Durante e encuentro cu sr. Barnard, Minister Oduber y conseheronan a dialoga detayadamente riba e mihor manera cu Aruba lo mester diseña y implementa e proyectonan den salud, manera e specialisacion di dokernan di cas na Aruba, prevencion, fortalece e promer linja di cuido . Un elogio a bay pa e diferente desaroyonan cu Aruba a conoce recientemente den cuido medico. Un elogio special a bay pa e “zorgakkord” cu na juli 2023 a wordo firma door di e diferente actornan den cuido. Esaki lo sirbi como un base caminda lo bay enfoca riba e mehoracion, planificacion di e organisacion y e desaroyo di e sector di cuido. Tur esaki ta parti di un plan financiero multi anual. Un mihor planificacion ta conduci na un cuido di calidad mas sostenibel cu enfoca ariba e patient y su cuido. Un ehempel grandi di esaki ta e proyecto caminda ta bay sigui desaroya e Aruba Health App, mescos ta bay pa proyectonan riba tereno di prevencion y cuido multidisciplinario pa pashentnan cu ta sufri di diabetes.
Locual mas a resalta di e bishita aki ta e compromiso y cooperacion continuo cu tin entre Ministerio di VWS y Ministerio di Turismo y Salud Publico cual enfoce ta pa salvaguardia e bienestar y salud di e habitantenan di henter Caribe Hulandes. Minister Oduber a termina bisando cu hunto nos lo sigui traha pa mehora e calidad di cuido y dirigi problemanan di gran importancia di cuido den nos region.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio