Home » Fiscal a exigi 4 aña di prison pa chofer sin rijbewijs cu a dal mata dama riba Linear Park y core bay

Fiscal a exigi 4 aña di prison pa chofer sin rijbewijs cu a dal mata dama riba Linear Park y core bay

by Admin
0 comment 209 views

ORANJESTAD – Awe mainta te den oranan di merdia, Corte den Promer Instancia a trata e caso penal cu Ministerio Publico a cuminsa contra e homber Ecuadoriano D.C.G. (24), kende ta wordo acusa cu riba 27 November 2022 a causa un accidente di trafico cu consecuencia cu Ana Rosa Montaño Martinez a fayece y cu D.C.G. a sigui core bay. Tambe e ta worde acusa di tabata stuur auto sin rijbewijs.

ARUBA NATIVE por a compronde cu D.C.G. na yoramento a pidi e pareha di e victima pordon. Fiscal a exigi 4 aña di prison pa D.C.G. di cual 1 aña ta condicional cu 3 aña di prueba y tambe cu pa 3 aña D.C.G. no por core auto.
PEGA SOÑO Y DAL DAMA MATA

E sospechoso D.C.G. a bisa Hues cu el a pega soño despues di e rotonde Las Americas banda di ex Talk of the Town y ora el a sinti e auto dal el a spierta y a ripara cu e auto tabata riba e acera banda robez. Esaki a sosode mas o menos 6.15 di mainta. D.C.G. no a ripara cu el a dal e victima, Ana Rosa Montaño Martinez cu tabata cana riba Linear Park y a sigui core bay.

CABA TRAHA Y BEBE 2 CERBEZ

Hues a puntra pakico el a pega soño. D.C.G. a bisa Hues cu e no tabata cansa pero a pega soño. Hues a bisa cu e por a compronde cu D.C.G. a traha anochi te 3’or marduga y despues a sali cu su amiga bay na dos club nocturno y despues a bay hiba un amigo su cas na San Nicolas. D.C.G. a bisa Hues cu ora e tabata bini Oranjestad, e tabata sinti cansa y soño. Segun Hues, D.C.G. a bisa Polis cu ora e tabata biniendo Oranjestad, diferente biaha el a pega soño tras di stuur. Durante interogacion di Hues, D.C.G. a bisa cu el a bebe dos Heineken despues di trabao. Hues a puntra D.C.G. pakico e no a pidi su amiga pa stuur ora tabata bin Oranjestad. Segun D.C.G., su amiga tabata burachi y a pega soño promer cu D.C.G. Hues a mustra cu tabatin chat entre D.C.G. y su amiga via whatsapp caminda ta mustra cu ta e amiga lo tabata stuur.

AMIGA KIER A TUMA CULPA

Hues a mustra cu tabatin chat entre D.C.G. y su amiga via whatsapp caminda ta mustra cu ta e amiga lo tabata stuur. Segun D.C.G., door di spanto di loke a sosode, e amiga a bisa cu laga haci cu e tabata stuur pasobra e tin rijbewijs y D.C.G. ta ilegal. Pero D.C.G. a nenga.

VIDEO DEN CORTE

Fiscal a pasa e video di seguridad di e x Talk of the Town den Corte riba un screen grandi. Por a mira cu net na otro banda di ex Talk of the Town, e victima tabata canando riba acera y e SUV Ford a subi e acera, dal e victima y despues dal contra un bari di sushi. Un rato despues por mira e luznan di brake sende y e auto a sigui core bay. E auto a sigui core cu e banda di luz drechi kibra. Segun D.C.G. riba facebook el a mira e accidente y a tum’e algun tempo pa realiza cu ta el a ocasiona e accidente. El a papia cu su mama y su amiga, kendenan a bis’e cu e por ta otro hende. D.C.G. a realisa cu e ta responsabel. E ora ey den oranan di anochi, el a bay Polis. Hues a puntra D.C.G., si e ta sinti culpa. D.C.G. a bisa cu e ta sinti culpa di no por a yama ambulance y por a scapa e victima. Hues a bisa cu si D.C.G. a haya les di core auto serca un professional e lo a siña cu no por core auto si bo ta sinti cansa.

ABOGADO TA DISCUTI CU FISCAL

Fiscal tabata interoga D.C.G. tocante bebemento. Fiscal a bisa cu un amigo lo a bisa cu D.C.G. lo a bebe mas bebida alcoholico. E momento ey mr. Carlo a lanta para y a reclama Fiscal cu e ta guia su cliente riba otro direccion pasobra ningun hende ta bisa cu D.C.G. a bebe otro bebida. Fiscal a bisa cu tin declaracion di otro cu ta bisa cu D.C.G. a bebe otro bebida. D.C.G. a bisa Hues cu su amiga y e amigo tabata bebi caba ora cu D.C.G. tabata trahando pero no cu el a bebe otro bebida mas cu ta solamente e 2 Heineken.

SOSPECHOSO A PIDI DISCULPA

D.C.G. a pidi disculpa na yoramento na e partner. El a pidi pordon y a bisa cu tur dia e ta pensa riba loke a sosode. E partner di e victima tambe tabata yora.

DEMANDA DI DAÑO

E homber F.C. a duna Hues e damanda di daño cu ta consisti di paga pasashi pa e yiu di e victima bin Aruba, gastonan di hiba e victima Santo Domingo y e entiero. Tambe tin gastonan di Funeral Home. Ademas F.C. a demanda daño inmaterial di 10 mil florin. Esaki pasobra el a keda afecta emocional door di e fayecimento di su pareha. En total ta mas o menos 26 mil florin e demanda di daño ta.

FISCAL

Fiscal a bisa cu Ana Rosa Montaño Martinez tin costumber di cana riba Linear Park. E lamentable accidente a causa impacto den comunidad. Mas ainda e hecho cu e auto a core bay. Fiscal ta haya cu D.C.G. ta culpable di morto di Ana Rosa Montaño Martinez. D.C.G. tabata traha na Mumba Beach Bar te 3’or di marduga y despues a sali cu su amiga y un amigo. Te mas o menos 5’or di mainta nan a keda den un club nocturno y despues D.C.G. a hiba su amigo cas te na San Nicolas. Ora di bin Oranjestad, for di rotonde aeropuerto, D.C.G. tabata core zig zag. Segun Fiscal, tin chofernan cu a mira e SUV Ford tabata core zig zag. Despues di rotonde Las Americas banda di ex Talk of the Town, D.C.G. a baha caminda na banda robez, subi acera y dal e victima y despues dal contra un bari. Despues di un rato el a brake y sigui core bay. Un persona cu tabata canando ey banda a yama Polis. Fiscal a bisa cu a base di declaracion di otro personanan, D.C.G. a bebe mas cu solamente 2 Heineken. El a mustra cu e windshield di e auto y e otro glasnan di e SUV tabata getint. Fiscal a bisa cu ta un hecho cu ora core cu auto cu glasnan getint den oranan di anochi, e ta bira mas dificil pa mira riba caminda. Fiscal ta haya cu D.C.G. tabata core irresponsabel door di core sin rijbewijs, cu glasnan di auto getint, bao influencia di alcohol, sin aseguro di auto y a pega soño tras di stuur. A dal e victima mata riba Linear Park y core bay. Fiscal a bisa cu Linear Park ta conoci cu hopi hende ta cana. Fiscal a splica cu door cu D.C.G. no a haci’e intencional, e ta haya cu ta D.C.G. su culpa. Esey ta haci cu e castigo ta bira menos compara si ta intencional. Fiscal a menciona sentencia den un caso di morto door culpa den accidente caminda e castigo ta 4 anja di prison.

Fiscal a exigi 4 aña di prison, di cual 6 luna ta condicinal cu 3 aña di prueba. Tambe Fiscal a exigi pa prohibi D.C.G. core auto pa un periodo di 3 aña. Tambe Fiscal a exigi cu e SUV Ford ta keda confisca. Pa loke ta demanda di daño, Fiscal a bisa cu pa e parti di daño inmaterial e ta aproba 5 mil di e 10 mil. Tambe el a bisa pa aproba e gastonan di entiero.

Hues despues di a scucha defensa di abogado mr. Carlo, a sera tratamento di e caso y a bisa cu dia 22 di September 2023 lo tin sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio