ORANJESTAD – Manera ta conoci, dialuna ultimo, Enseñansa pa Empleo a cuminsa cu varios curso pa e siguiente lunanan. Señor Francis Trimon, cu ta e Horeca Program Manager na EPE, a indica cu e interes di pueblo pa busca un miho futuro ta halto, mirando cu e cursonan cu a caba di cuminsa ta practicamente yen.
Minister di Labor Glenbert Croes tambe ta contento di mira e interes grandi cu tin pa forma parti di cursonan brinda pa EPE, ya cu esaki ta e yabi, pa mañan tur e studiantenan aki ta bon prepara pa drenta e mercado laboral. Actualmente, tin un scarcedad di profesionalnan den e sector horeca, cu ta un di e sectornan mas importante pa e economia di pais Aruba. “P’esey ta yena mi di satisfaccion pa wak cu tur e cursonan aki ta completamente yen y cu pronto Aruba por conta cu hendenan capacita pa brinda un miho servicio na nos bishitantenan. E demanda internacional pa bishita Aruba ta halto y nos como gobernantenan mester percura pa e keda asina. P’esey nos lo sigui coopera y stimula e comunidad completo, pa forma parti di e cursonan di EPE, pa asina yuda fortalece e mundo di hospitalidad y engrandece e economia di pais Aruba” Minister Croes a expresa.
Minister Croes kier encurasha tur esnan cu tin e necesidad pa un trabou of cu kier sigui crece den nan liña di trabou, pa bay inscribi na EPE, pa asina engrandece nan conocemento, cu e resultado di por drenta mas facil y cu miho credencial, nos mercado laboral. Un danki ta bay na e team dinamico di EPE, pa nan esfuerso, dedicacion, y pasion, den crea profesionalnan den un termino cortico. Tambe ta gradici Aruba Hotel and Tourism Association pa nan bon cooperacion pa cu EPE y di a provee materialnan cu tabata necesario pa eleva y completa e curso di waiter/waitress.
“Mi kier a desea tur cursista cu a caba di cuminsa cu nan curso na EPE, tur clase di exito pa cu e siguiente lunanan di estudio. Tambe mi ta gradici cada un di nan, pa a tuma e decision di sigui studia y bay dilanti, yudando asina, nan mes y pais Aruba progresa” Minister Croes a expresa.
