Mensualmente Horacio Oduber Hospital (HOH) ta brinda reconocimento na un colega cu a destaca den su trabou y pa e luna di augustus 2023, a toca turno na dokter di piso Noëlia Khalil. Noëlia no a sospecha nada di e gran sorpesa aki y hasta a pensa ora ela drenta cu e lo ta un surprise di despedida door cu awo e ta bay sigui cu su studio na Hulanda. Pues un surpresa grandi pa Noëlia ora hunto cu colega, specialista y famia ela haya sa cu ela wordo nombra como empleado di luna na Hospital. Un celebracion exitoso cu a laga Noëlia completemente emociona.
E hospitalistanan hunto cu manager di piso y otro coleganan a manda un bunita motivacion pa Hunta di Directiva contando e trayecto di Noëlia y su cualidadnan unda ta describi dicon e merece bira empleado di luna na HOH. Noëlia a studia na Costa Rica y a cuminsa traha na HOH 3,5 aña pasa formando parti di e proyecto cu ta pa dokternan cu no ta registra den BIG-register (registracion rekeri pa mediconan na Hulanda). E proyecto aki ta pa asina nan por obtene e registracion di BIG aki pa por sigui specialisa na Hulanda pa despues Noëlia regresa su isla.
For di comienso caba ela demostra di tin un pasion y amor grandi pa su trabou y su pashentnan. Tur dia e ta haci su maximo esfuerso pa duna e miho cuido posibel na su pashentnan. Ademas, e ta traha bon den team unda cu e ta e ‘glue’ di e grupo di dokternan di piso. Semper e ta cla pa yuda y ta reacciona lihe den situacionnan agudo y di stress. E tin hopi pasenshi y comprension, tratando coleganan cu respet hasta ora tin tension e ta keda trankilo. Noëlia ta traha duro y y tin hopi talento riba tereno di cuido medico. Pashent, colega y specialistanan tur tin confiansa den dje pa cu su experticio y ehecucion di su trabou.
Loke ta haci Noëlia special ta cu no solamente e ta enfoca continuamente riba brinda calidad di cuido pero tambe ta dedica na eleva calidad di cuido door di scirbi protocol y procesonan. Tambe semper e ta haya importante pa siña enfermera y otro coleganan e practica di trabou. Y di e forma aki e ta purba pa semper stimula coleganan pa sigui duna un bon calidad di cuido na nos pashentnan. “Noëlia ta sigui studia y update su conocemento constantemente. E ta un persona humilde pero fuerte y a demostra su nificacion excepcional pa pashent, colega, HOH y comunidad di Aruba”, asina Jacco Vroegop, director di HOH a menciona durante e sorpresa organisa pa Noëlia.”
Noëlia merece di ta den ‘spotlight’ prome cu e sigui su carera na Hulanda. Ful team HOH ta gradici Noëlia pa su dedicacion na cuido medico di Aruba y ta spera cu e t’ey pronto bek pa reforsa team di HOH y sigui contribui na eleva e calidad di nos cuido medico. Masha pabien Noëlia!
