Hulanda ta ofrece e Paisnan Curacao, Sint Maarten y Aruba pa refinancia e fiansanan cu nan a ricibi pa enfrenta e consecuensianan di e pandemia di corona. E fiansanan, cu ta suma 1.17 biyon euro, ta caduca dia 10 di october di e aña aki. Si e paisnan bay di acuerdo cu e propuesta Hulandes, nan ta ricibi e oportunidad pa paga e debe bek den un tempo mas largu, na e interes actual. Esaki ta necesario pa e paisnan por keda paga facilidadnan importante pa nan habitantenan. Secretario di Estado Alexandra van Huffelen lo manda un carta awe tocante esaki pa Tweede y Eerste Kamer.
Conseho di Minister di Reino a tene cuenta aña pasa caba cu e Paisnan, pa motibo di e amplitud di e fiansanan y cu bista riba e recuperacion di finansas publico, no lo ta capacita pa paga e fiansa completo bek prome cu e debe caduca. Pa e motibo ey gobierno Hulandes na inicio di aña a dicidi pa ofrece un refinanciamento completo na e paisnan.
Condicionnan pa refinanciamento
Pa yega na remarke di e refinanciemento faborabel y un interes abou, e Paisnan mester cumpli cu un cantidad di condicion. A puntra tur pais pa demostra di ki forma lo reforsa nan propio economia e añanan benidero. Pa medio di entre otro elabora un asina yama ‘Meerjarig Economisch Kader’ es decir un Cuadro Economico Multianual cu ta duna un bista riba inversionnan plania y reformanan. Tambe Hulanda ta pidi un calculacion independiente di e consequencianan di e refinanciamento, pa por determina e peso di e debenan pa cada pais individual.
Sint Maarten ta e prome pais cu a finalisa e calculacionnan di e refinanciamento. Di esaki a resulta cu e finansas publico pa e añanan benidero ta keda vulnerabel. Pa e motibo ey a ofrece Sint Maarten e fiansa cu un periodo liber di pago bek y Sint Maarten ta ricibi e posibilidad pa paga e fiansa den un tempo mas balansa.
Acuerdonan tocante supervision financiero den un Ley di Reino
Banda di e condicionnan general, tin algun condicion specifico pa cada pais. Pa Aruba ta conta cu nan mester bay di acuerdo cu un Rijkswet (Ley di Reino), den cual ta regla supervision financiero di forma duradero. Mirando cu no tin un acuerdo di maneho cu Aruba tocante e Rijkswet (Ley di Reino), ta ofrece Aruba e fiansa cu un interes mas halto (6 – 8%). Esaki ta coresponde cu e interes cu Hulanda lo pidi paisnan cu un creditrating similar. Mas aleu Aruba no a entrega un calculacion ainda di e refinanciamento di e fiansa. Si Aruba dicidi di bay di acuerdo cu e Rijkswet (Ley di Reino), e tambe ta bin na remarke pa e interes mas abou di 3,1%. Na momento cu nan entrega e calculacion independiente, lo por palabra pa personalisa e struktura di e fiansa y pago.
Problematica di Ennia na Curacao y Sint Maarten
Pa Curacao y Sint Maarten ta bini aserca cu un acuerdo administrativo ta necesario pa un plan di rescate financieramente realistico pa e compania di seguro di pension Ennia. E compania di seguro di pension na e momento aki tin dificultad cu un deficit financiero enorme, cu consecuencia cu 30.000 asegurado ta core peliger di un recorte na Curacao y Sint Maarten. Den caso cu e compania di seguro di pension aki yega na bay failliet e consecuencia nan social economico pa ciudadanonan di e paisnan lo ta grave. Hulanda ta dispuesto pa duna ambos pais un fiansa pa por haci un reinicio posibel y di e forma aki ofrece seguridad na e aseguradonan na Curacao y Sint Maarten.