Den Haag – Den stadhuis di Amsterdam a tuma lugar un encuentro pa e studiantenan di Curaçao, Aruba, Boneiro y St. Maarten cu e aña aki ta bai cuminsa cu un estudio na un Hogeschool of Universidad na Amsterdam. Municipio di Amsterdam desde 2010 ta organisa e encuentro aki pa yama e studiantenan di e parti Caribense di Reino Hulandes bon bini na Amsterdam.
Invitadonan special tabata e Ministernan Plenipotenciario di Curaçao, St. Maarten y Aruba, cu ta respectivamente Carlson Manuel, Rene Violenus y mr. Ady Thijsen. Tambe presente tabata directora a.i. di Arubahuis drs. Glenda Hernandez y mentor pa Amsterdam Lourdes Bramble-Tromp.
Como parti di e programa señora Lotte Terwel, gobernante di e “Dagelijks bestuur stadsdeel Centrum ” a tene un discurso na e grupo di studiantenan. Akinan señora Terwel a bisa cu e ta spera cu e studiantenan nobo por habri nan hala y siña conoce e ciudad manera ta e caso cu hopi hende pa siglonan a bin Amsterdam. ‘Esaki a haci Amsterdam yen di bida y un caminda alegre pa studia, biba y traha. Mi mes tin 23 aña ta biba na Amsterdam y ami tambe a yega sin conoce ningun hende. Mi suerte a resulta di ta un “studentenvereniging ” cu mi a bin den contacto cune y unda mi a conoce hopi hende cu te ainda mi tin contacto cu nan. Kisas na comienso ainda bo no a haya bo balans. Pesey mi ta bisa boso tur pa busca contacto y sosten cerca otro hende’.
Señora Terwel a bisa cu recien e tabata na e Concierto pa Tula y akinan e cantante Izalin Calister a tene un homenahe pa Tula. ‘Calister a usa como metafor cu bo mester busca e Tula den bo; e heroe y luchador y esaki ta loke mi kier duna boso tambe como mensahe,’ segun Lotte Terwel.
Minister Plenipotenciario di Aruba mr. Ady Thijsen tambe a bisa e studiantenan cu estudio tin su retonan y pesey bo mester ta bon organisa. ‘Corda cu banda di bo estudio tambe bo mester tin un bida social. Corda semper cu Arubahuis tey pa boso como studiante. E departamento di Ensenansa di Arubahuis ta disponibel, mescos cu ta e caso cu e mentornan.’
Minister Thijsen a haci un apelacion riba e studiantenan pa caba nan estudio y pa bai bek Aruba, mirando cu segun e mandatario e comunidad a cambia y tin un generacion nobo y e generacion aki ta nesesario pa traha na e futuro aki di Aruba.
E studiante Arubiano Claire Dumfries a haya e oportunidad pa tene un charla unda e como di dos aña ta studiando na Amsterdam a conta di su experencia y asina duna e studiantenan nobo aviso y tipnan con nan mester mira nan prome aña como estudiante. Segun Claire un bentaha grandi cu e studiantenan Caribense tin, ta cu nan ta bin di un isla. ‘Esaki ta nifica cu automaticamente un dia lo bo mester bandona bo isla natal pa sigi un estudio avansa. Bo ta sali for di bo “comfort zone” y cuminsa cu algo nobo, lagando bo famia y amigonan atras. Tur loke bo ta experencia ta aplastante y unda bo mester regla tur cos. Tambe mi kier a apunta cu nunco bo mester tin miedo di puntra pa ayudo, sea na bo scol, mentor of mayor. Tene cuenta con bo ta bai om cu placa y por ultimo mi kier a bisa boso cu Amsterdam tin hopi di ofreci y haci uso di esakinan pa amplia bo conocemento di Amsterdam,’ asina Claire Dumfries a bisa.
E programa a continua na unda Tanja Fraai a entrevista diferente studiante tocante nan estudio, e rason pa a scohe pa bin studia na Amsterdam y otro topiconan interesante.
Na final e studiantenan a participa na un quiz pa mira con bon nan conocimento di Amsterdam ta, sigi pa un introduccion di diferente instancianan, manera Hogescholen, Gemeente Amsterdam y organisacionnan di studiante cu ta di importancia pa e studiantenan.
Nota pa redaccion: E potretnan ta cortesia di Arubahuis