Diaranson, 23 di augustus 2023, Kiwanis Club of Aruba (KCA), e club cu ta brinda servicio na e comunidad di Aruba desde 1964, a otorga reconosemento na un deportista di BMX esta Kailen Wouters.
Kailen ta un hoben cu a cuminsa como ‘strider’ na e edad di 1 anja y mei. Como strider el a asta competi na Merca y Curaçao titulando campeon na varios ocacion. Den transcurso di su trayectorio como deportista di BMX e la pasa di ‘strider’ pa bais di pedal y sigui pa bais di ‘cross’. Den su carera di BMX, Kailen ta carga e titulo di campeon pa 4 aña consecutivo como Campion Nacional den su respectivo categoria aki na Aruba.
Kailen a participa den diferente careda internacional y na diferente pais rond mundo manera na Alemania, Colombia, Curaçao, Hulanda y Merca. Na 2021 Kailen ta logra termina den e ‘national ranking’ di Merca na di 8 lugar. Na 2022, Kailen ta logra yega final den mundial na Glasgow, Schotland y ta keda na di 2 lugar di mundo den e categoria di su edad e tempo ei.
Aparte di BMX, Kailen ta forma parti di ‘Aruba Dolphins Swimming Team’ y ta competi regularmente ganando diferente titulo den e deporte aki. Kailen tin 2 aña ta competiendo den ‘Kids of Steal Triathlon Competition’ y ta logra titula campeon na ambos ocacion den su categoria.
Kailen ta bishita su scol EDUCampus Aruba cu ta dune e espacio nesesario pa e por competi y practica su deporte nan pa representa Aruba den exterior. Aparte di e deporte nan menciona su pasatempo nan ta hunga futbol cu su amigonan, bodyboarding y snorkeling. Su meta ta pa mantene su mes den top di su deporte nan, sigui train duro y defende su titulo mundial enbusca di e titulo maximo di Campeon Mundial.
Kailen tin tres careda mas pa competi na Merca e aña aki. Na November lo tin e competencia renombra BMX USA Grands Nationals na Oklahoma, Merca. Kailen ta forma parti di e team Nr. 1, esta J&R National Team USA y nan lo participa pa e titulo National. Kiwanis Club of Aruba ta duna merito y reconosemento na Kailen pa su pasion, dedicacion y determinacion pa sigui engrandese su talento como deportista di BMX. KCA ta otorga Kailen un donacion completo pa por participa den e gran competencia di BMX USA Grands Nationals na Merca. Alaves ta desea Kailen tur clase di exito y ta apoye pa e por logra e titulo maximo.
Kiwanis Club of Aruba ta forma parti di Kiwanis International cu ta un organisacion global di boluntario dedica na mehora mundo “one child and one community at a time” y tin como lema: sirbiendo e muchanan di mundo. Pa mas informacion di Kiwanis Club of Aruba por bishita nan pagina web na www.kiwanisclubofaruba.org of nan pagina di social media.
Potret cu e press release:
Di rechts pa links: President Jokoeza Hooplot, Past President Ingmar Ramharakh hunto cu Kailen Wouters y Famia
Past President Ingmar Ramharakh hunto ku Kailen Wouters
Kailen den accion
