Desde luna di mei 2023 Horacio Oduber Hospital a cuminsa publica mensualmente diferente cifra di tur loke ta sosode na nos Hospital pa loke ta cuido. Estadisticanan ta importante y ta brinda transparencia treciendo claridad na nos clientenan, pashentnan y bishitantenan. P’e luna di juli ta ripara cu e cifranan ta poco menos cu ta algo sumamente usual na hospital durante temporada di vakantie.
Durante luna di juli 2023 a hospitalisa 813 contrario na luna di juni cu tabata 873 pashent pues 70 pashent menos. Di e 813 pashent un total di 60% tabata drenta cu emergencia, 25% tabata admision planea y 15% tabata pashent via policlinica admiti cu emergencia. Cada pashent cu a hospeda den Hospital a keda un promedio di 4,4 dia y durante luna di juli e ocupacion di cama tabata na 94,7% compara cu luna di juni cu tabatin un ocupacion di 97,6%.
Un total di 528 operacion a tuma luga y a nace un total di 78 baby (44 mucha homber y 34 mucha muhe). Tambe na juli donantenan a pasa Bloedbank pa haci e bunita gesto di un total di 206 donacion di sanger.
Departamento di Emergencia a mira un total di 2.883 pashent cu ta menos cu luna pasa cu tabata un total di 3.817 pashent. Di e 2.883 pashent 1.269 no tabata caso di emergencia. Luna pasa esaki tabata un cantidad di 2.157 pashent cu no tabatin urgencia, pues tabata pashent di dokter di cas of dokter na warda.
Specialistanan den servicio di HOH a haci durante luna di juli un total di 6.658 consulta na policlinica cu pashent compara cu e 7.429 consulta cu a tuma luga na luna di juni. Departamento di Radiologia a haci un total di 4671 test manera CT scan, MRI y mas. Un total di 10.705 persona a bay LABHOH pa haci nan test y total di 780 pashent a sali for di Hospital.
Danki na team completo di HOH cu durante temporada di vacacion a sigui 24/7 cu e bunita trabou aki y ta demonstra cu nan semper t’ey pa nan pashentnan, bishitantenan y comunidad di Aruba henter.