ORANJESTAD: Diadomingo atardi, memey di famia y conoci Minister Endy Croes a ricibi e atleta Brandon Rincones cu a yega Aruba di Austria, despues di a logra e titulo di campeon cu Team Kingdom U23. Den un partido emocionante seleccion di Hulanda a derota ekipo di Inglatera cu e score di 23-5 y asina titula campeon di European Baseball Championship 2023. E campeonato Europeo di baseball a tuma luga a aña aki na Austria. Famia di Brandon y amistadnan tabata super contento y a yega aiport pa topa cu ne. Sigur e pelotero Brandon Rincones tabatin un tremendo campeonato unda cu el a luci y briya den “shortstop”. Mester añadi cu tres (3) Arubiano a forma parti di seleccion di Hulanda U23, esta Jeandro Tromp, Brandon Rincones y Edvin Irausquin. Esaki ta di dos (2) aña consecutivo cu seleccion di Hulanda ta titula campeon di e toreno. Minister Endy Croes ta felicita Brandon Rincones pa su excelente prestacion na e torneo aki. Alabes mandatario di Deporte ta felicita famia- y coachnan cu e triunfo aki. Cu deseo, disciplina, determinacion y dedicacion ta logra. Aruba ta orguyoso di bo Brandon!