Diadomingo den careda di 12’or y mey di marduga, na e rotonde di Paradera, un auto di marca Honda tabata biniendo di pabou, e chauffeur yegando e rotonde a dal hopi duro contra e acera, y a subi esaki.
E la kap e dos tirenan di banda rechts di e auto. E medio perde control y a bay para schuin riba e caminda bandi pazuid. Dje e la reverse bira tuma e caminda pazuid di e rotonde bay zuid.
E chauffeur a sigui core riba dos tire gekap. E chauffeur tabata mustra burachi, e tabata core memey caminda, treciendo trafico na peliger.
Chauffeur di un auto cu a mira kiko a sosode na rotonde Paradera a dicidi di yama polis y sigui e auto. Asina e tabata avisa polis ki direcion e auto tabata tumando.
E auto tabata core memey di caminda y constantemente e tabata hala full na e banda robes di caminda. Varios auto mester a brake of baha caminda p’e.
Na rotonde Sero Patrishi e la pasa over di compartimentonan di beton riba caminda, casi causa un accidente. Aki e la subi Watty Vos Boulevard bay direcion zuid. Riba Watty Vos Boulevard por a mira con e resto di tirenan a cuminsa bula y auto a keda full di banda riba dos rim. E la pasa rotonde Cumana bay direcion di rotonde Wayaca eynan e la bira bay direcion di Primavera. Algun meter yegando su cas, polis a logra pare.
E homber tabata mustra basta bebi. Na e sitio e homber a bisa polis cu ta djis dos flat tire e la haya aki cerca mes. Mientras cu por a mira bon cla na e dos rimnan cu no ta asina.
Polis na e sitio a pidi pa un alco-sensor, un patruya a bin trec’e y e despues di varios intento e la logra supla riba 800 Ųgl esaki sigur a surpasa e limite stipula pa ley.
E chauffeur di e Honda mesora a wordo deteni y transporta pa warda di polis.
