Rudolf Arendstraat:
Diasabra algo prome cu 12’or y mey di merdia, presencia di polis y brandweer a wordo pidi cu urgencia pa un warehouse cu lo ta na candela den Rudolf Arendstraat.
Mesora a manda polis y brandweer na e sitio, na yegada a bin compronde cu na e adres Rudolf Arendstraat 41 tin un negoshi y enberdad tin un candela, cu na prome instante a kere cu ta un freezer grandi lo ta na candela, despues a resulta cu ta e fusebox lo tin problema y esaki lo a causa e candela.
No ta tur candela por paga cu awa incluyendo ora tin di haber cu coriente, sigur no por yega spuit e cu awa. Normalmente ta usa un tipo di puiro special pa paga esaki, especialmente ora ta trata cu coriente. Ambos truck cu e yega na e sitio no tabata tin e puiro special aki.
E personal di brandweer cu tabata na e sitio no a perde tempo, a pasa man pa un shovel y hopi lihe a logra paga e candela den e fusebox door di tira santo riba dje y asina a domina y a paga e candela.
Elmar a wordo pidi na e sitio pa desconecta e coriente. Polis a conseha e doño di e edificio pa busca un electricien tambe, pa drecha e problema di coriente aki.
