Home » Minister Maduro di Finansa ta informa: DESDE 1 DI AUGUSTUS 2023 INVOERRECHTEN DI VARIOS ARTICULO LO BAHA

Minister Maduro di Finansa ta informa: DESDE 1 DI AUGUSTUS 2023 INVOERRECHTEN DI VARIOS ARTICULO LO BAHA

E Decreto Ministerial pa baha tarifa riba impuesto di importacion riba mas di 660 post a keda publica

by Admin
0 comment 336 views

Minister Xiomara Maduro ta informa cu hunto cu e cobransa di BBO na frontera tin un simplificacion y cambio den tarifa di impuesto riba importacion (invoerrechten) di varios producto. E Decreto Ministerial pa introduci e simplificacion y rebaho den invoerrechten a keda publica dia 26 di juli 2023 den ‘Afkondigingsblad’. Den e lista cu ta compaña e Decreto Ministerial ‘Regeling tijdelijke tariefsverlagingen invoerrechten,’ por mira tur e categorianan di producto pa cual nan tarifa di impuesto lo baha desde 1 di augustus proximo. Ta trata aki di mas di 660 post cu ta conoce un cambio. Aki ta sigui algun ehempel pa categoria di producto.

 

Cuminda y bebida

E mandatario ta informa cu e tarifa di importacion riba algun producto di cuminda y bebida ta baha, por ehempel, productonan pa cual tabata cobra 6% manera buttermilk, baking powder, yoghurt cu fruta of cacao y azeta, ta bira 0%. E tarifa di 12% pa chuculati y coconut milk ta baha na 6%. Binager y cuminda pa bestia tambe ta baha di 12% pa 6%. E tarifa pa oester ta baha di 32% pa 22%.

 

Aparato pa genera energia berde, vehiculo electrico y auto

Pa loke ta trata aparato cu ta consisti di energia y aparato pa genera energia berde e tarifa ta baha di 2% pa 0%. Esaki ta conta pa airco di tipo inverter, airco di sistema VRF y VSV, frigidair, freezer y vitrinanan di energia eficiente, wasmachine y dryer di energia eficiente, tambe bombio di luz di energia eficiente y bombio di LED. Turbina di biento y parti di dje y solar panels y parti di dje tambe ta conoce un reduccion di tarifa di 2% pa 0%. E tres diferente invoerrechten pa auto di respectivamente 30%, 40% y 50% ta wordo ahusta na un solo tarifa di 32%. Pa vehiculo electrico, di transporte di 10 persona of mas, brommer, segways y bais electrico e tarifa ta baha di 2% pa 0%.

 

Producto di industria di textiel, instrumento musical y buki

E tarifa di importacion pa algun producto di industria di textiel manera tela, serbete, cortina y klechi di cama, tambe ta baha di 12% pa 6%. E tarifa di importacion riba instrumento di musica manera klarinet, trompet, saxofon y fluit a conoce un reduccion di 22% pa 12%.

Pa loke ta trata buki, e tarifa ta baha di 6% pa 0%. Esaki ta encera buki di dibuho, pintura, color pa mucha, buki di musica, scirbi, imprimi of ilustra, material cartografico imprimi di tur sorto (atlas, mapa mural, y globo).

 

Material pa construccion y otro productonan

E tarifa di importacion pa material di construccion cu actualmente ta 10% ta wordo reduci na 6%.  Alabes ta reduci e tarifa di importacion di otro productonan manera stempel, djente sintetico/artificial, mashin pa stimula curason di 12% pa 0%. Pa hangers, tabla pa strika paña, glas di bebe y decoracion, articulo di cushina (cuchiu, forki), pampers pa baby, tampons, e tarifa ta wordo reduci di  12% pa 6%.

 

Decreto Ministerial riba www.gobierno.aw

E Decreto Ministerial ‘Regeling tijdelijke tariefsverlagingen invoerrechten’ hunto cu e lista di e tarifanan cu ta conoce un rebaho, ta disponibel via https://www.overheid.aw/actueel/afkondigingsbladen_46859/ 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio