Home » Parlamentario independiente mr. dr. Ryçond Santos do Nascimento: Evaluando e ponencianan di Mike Eman

Parlamentario independiente mr. dr. Ryçond Santos do Nascimento: Evaluando e ponencianan di Mike Eman

by Admin
0 comment 255 views

 

 

 

Nos por a tuma nota cu ultimo tempo Mike Eman a bira mas activo den prensa. Pero, su declaracionnan ta mustra claramente cu Mike Eman no tin ningun compasion cu e situacion financiero di e trahado. Mayoria trahado ta haya un salario pa quincena of pa luna. Como cu e trahado tin gasto su salario mester paga pa vivienda, awa y coriente, cuminda, paña, transporte y cos manera crèche of skol di e muchanan. Mayoria no ta spaar y hopi biaha ta prefera hunga lotto. Bo mester tin “bo liña na awa”. Ora e salario no ta yega e trahado tin varios opcion: (1) busca manera pa gana mas, (2) gasta menos of (3) fia placa. Problema ta cu fia ta crea debe y debe tin e tendencia di crea mas debe.

 

Mike no por ta worry cu e trahado aki, pasobra constantemente e ta atacando disciplina fiscal. Mike ta predica e mentira cu disciplina fiscal ta conduci na pobresa. Asina nos por a scucha Mike bisa cu gobierno mester stop di haci rekensom. Segun Mike gobierno mester laga tur burocracia y tecnocracia un banda pa tuma decision cu curason. Di e forma aki e por tilda Evelyn Wever-Croes di no tin curason, mientras na mes momento Mike por propone pa Aruba djis fia mas placa. Ta nos yiunan y nietonan ta bay pag’e toch. Esey ta un mentalidad di sinberguensa.

 

Si Mike tabata un politico serio y cu tin interes di pueblo na pecho, Mike lo a splica cu disciplina fiscal ta nifica cu e placa cu gobierno ta cobra via Departamento di Impuesto y via Aduana (invoerrechten) mester cubri e gastonan di gobierno. Mike lo a splica cu gobiernonan cu ta eherce disciplina fiscal ta controla nan gastonan miho, tin menos debe nacional y tin nivelnan di corupcion mas abao. P’esey gobiernonan cu ta eherce disciplina fiscal por tin un sistema di enseñansa mas avansa, un sistema di transporte publico pagabel y puntual, cuido medico sostenibel etc. 

 

E realidad ta Mike Eman a goberna sin disciplina fiscal. EL a prefera di crea debe y asina Mike a bira coautor di cada medida cu Evelyn Wever-Croes a tuma. Djis wak e proyecto Bo Aruba. Eynan so a bay mas cu 1 biyon florin. Pero loke su votadornan no ta realisa ta cu proyecto Bo Aruba a crea oportunidad pa friends & family di AVP mafia mas di 100 miyon florin, o sea 10%, na e proyectonan pa e simpel motibo cu no tabatin un administracion profesional.

 

Cu tanto oportunidad cu Mike a crea pa corupcion e chens ta grandi cu e friends & family di AVP a defrauda pais na balor di miyones. Al fin y al cabo Mike a rondona su mes di hende cu no ta integro. De Meza ta un ehempel actual. De Meza a gaña pueblo cu bendicion di Mike Eman, ora cu De Meza a bisa cu el a haya un negatief cassatieadvies, mientras cu e cassatieadvies tabata positivo. De Meza a bisa cu e no a exonera Eddy Briesen, pero danki na De Meza awe pueblo mester paga mas cu 2 miyon florin na daño y perjuicio na Lee Tofanelli and associates Inc. Otro ehempel ta Paul Croes cu tambe tabata minister bao Mike y awe Corte Suprema a confirma cu Paul mester sinta un castigo pa soborno. Pa lunanan largo Mike Eman y Benny Sevinger tabata tilda Ministerio Publico di ta hibando un persecucion infunda y politico den caso Avestruz. Sin embargo un hues imparcial a haya Benny culpabel di soborno, o sea corupcion. Hues tambe a impone castigo riba Susebeek, Mansur, Nuñez y Leoncita. Nan a enrikece nan mes door di defrauda pueblo. Tur tabata friends di AVP. Ta ken ta kere ainda cu e integrantenan di e old boys network ta integro? Anto ta hustamente nan tabatin acceso na mas cu 1 biyon florin.

 

Pueblo mester tin hopi cuidao di un politico cu ta ataca disciplina fiscal, pero no ta ataca e corupcion cu a tuma luga bao su liderazgo. E realidad ta cu no ta disciplina fiscal ta crea pobresa, pero corupcion si ta crea pobresa. Ademas, mas debe ta conduci na mas medida. Asina ta cu de facto Mike ta planeando un pais unda bo ta paga impuesto na nivel di un pais rico, pero na unda e servicionan publico ta na nivel di un pais na bancarota.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio