Pabien na studiantenan Darlene Dol y Vanya Tromp cu nan beca ricibi
Dialuna mainta, durante e conferencia di prensa di Gobierno di Aruba, Presidente di Xavier University School of Medicine, señor Ravi Bhooplapur, dr. Arun Dubey, dr. Kevin Pawlak y señor Frank Croes hunto cu Minister di Educacion Endy Croes, a haci entrega di dos beca na balor di Awg 189.000. e becanan a wordo entrega na studiantenan Darlene Dol y Vanya Tromp, dos studiante Arubiano cu tin e pasion pa continua nan estudio den medicina. E becanan ta cubri 4 aña di estudio completamente gratis pa e dos studiantenan aki.
Prome Minister Evelyn Wever-Croes ta gradici Xavier University School of Medicine pa kere den pais Aruba, y pa tur e inversionnan cu nan ta haciendo den nos economia, na unda ya nan a construi un campus na Hato cu ta conta cu 198 camber. Na momento aki nan ta den construccion di e siguiente fase cu lo tin otro auditorio, laboratorio y klas lokaalnan.
E inversion di Xavier University ta uno di 70 miyon dollar. Tambe, Prome Minister ta gradici Minister Endy Croes pa su vision y determinacion den engradece nos sistema di enseñansa, guiando Xavier University den e direccion necesario pa yuda nos sistema di educacion na Aruba.
Prome Minister ta felicita Darlene Dol y Vanya Tromp pa a logra bini na remarca pa e beca aki, pasando nan evaluacion y entrevista exitosamente. “Mi ta desea boso tur clase di exito den boso estudio durante e siguiente 4 añanan. Masha pabien na e mayornan y demas famia cu e logro di boso yiunan, y na Xavier University pa duna e studiantenan aki e oportunidad grandi di yega na un profesion asina importante na Aruba mes. Mi ta sumamente orguyoso di nos studiantenan y spera cu pronto nos por conta cu dos di e miho docternan aki na Aruba,” Prome Minister a expresa.
