Texas, heat wave, presion riba power grid y ta boga pa mas planta di coriente di gasnan natural, enbes di energia renobabel.
Texas, Estados Unidos:
Problemanan cu coriente na Texas ultimamente ta birando mas frecuente. Esaki pa motibo di e cambio drastico di temperatura. Temperaturanan mas abou of mas halto cu normal, heatwaves etc. ta causando mas presion ariba e red di coriente. E red di coriente na Texas ta isola for di e resto di pais. Esaki tambe ta e caso cu esun di Aruba, pa motibo cu nos ta un isla.
Recientemente na Texas a pasa un Tornado y un heatwave cu temperaturanan riba 100 grado Fahrenheit (37.8C) , Electric Reliability Council di Texas (ERCOT) mester a pidi e residentenan pa baha nan consumo di coriente y hisa e temperatura di nan airconan. Esaki pa pone menos presion riba e red di coriente.
Segun e website PowerOutage.us, siman pasa interupcion di coriente a sigui na Texas, Oklahoma y Louisiana, esaki pa diferente motibo.
Na mei aña pasa, Texas a confronta e mesun problema di coriente aki caba, tabata pronostica caba cu 2023 e temperaturanan lo bolbe subi atrobe, pues tabata un desaroyo cu nan por a mir’e ta bin.
E gobernador di Texas, Greg Abbott no tabata mucho di acuerdo cu Texas a pidi su cuidadanonan pa uza menos coriente door di e presion riba e red di coriente.
Aruba tin’e bou control
Na Aruba e situacion aki ta bou control, pa motibo cu Aruba si lo por produci mas energia si ta necesario, compara cu Aruba esaki ta keda un problema pa otro lugarnan entre otro Corsou y estadonan manera Texas.
Asina mes na Aruba e compania di electricidad NV Elmar ta enfoca hopi riba consumo consciente pa spaar riba e factura. Na Aruba nos ta custumbra di uza un cantidad halto di KWh., pero no ta bin di e perspectiva cu tin problema pa produci mas energia manera otro paisnan.
Na Texas a pronostica caba cu na 2036, e cantidad di dia cu e temperatura lo ta riba 37.8 C. lo redobla. Riba dje cu e población ta creciendo hopi lihe y esaki lo pone tambe cu e demanda di coriente lo kibra record. Actualment mes nan ta confrontando problema, ora di temperaturanan extremo calor of frieu y ora di cualke eventualidad.
Siman pasa so, un tornado a haci daño na un substation di un bario chikito y e por bisa henter weekend e bario no tabata tin coriente.
E planta nuclear di Texas cu a stop produci coriente, siman pasa a afecta varios parti.
Un storm a dal Houston diaranson anochi, lagando mas di 100.000 persona sin coriente te diahuebs atardi.
Mas Power plant di gas natural na Texas
Na Texas nan ta consiente di e presion cu e extremo calor ta pone riba nan red di coriente, esaki ta un menasa pa e motibo aki ta boga pa mas power plant di gasnan natural enbez di energia renobabel, cu ta depende di biento y solo.
Motibonan cu ta trece problema pa e red di coriente:
Calor extremo y un demanda record di energia
A genera menos bientu cu a spera.
Fluctacionnan diario den generacion di energía solar.
Un gran mayoria di Mericano ta mas pro energía renobabel (66%) esaki segun un encuesta di Pew Research Center y a conseha e gobierno Federal pa haci mas pa stimula e producion di energía solar y biento, pero mayoria di Mericano no ta contra pa genera coriente via petroleo, gasnan natural of Mina di Kool.