Hues a rechaza peticion di abogado pa laga e sospechoso den libertad, paso e ta haya e acusacionnan di soborno y labamento di placa hopi serio.
Agente di Polis ta kere sera te dia di e caso penal na September 2023
ORANJESTAD – Algun rato pasa Corte di Husticia a caba cu tratamento di e caso pro forma den e caso penal contra e agente di Polis, R.M.V.
ARUBA NATIVE por a compronde cu R.M.V. ta keda sera te dia 21 di September 2023 mainta ora cu lo bay trata e caso.
CASO PRO FORMA
Ta asina cu caso pro forma ta solamente pa fiha un fecha pa tratamento di e caso penal. No ta bay den detayes riba e acusacionnan. Tambe ta asina cu abogado lo por pidi Hues pa su cliente wordo poni den libertad pendiente di e fecha cu fiha pa tratamento di e caso.
ACUSACIONNAN
E acusacionnan cu Fiscal a presenta contra R.M.V. ta cu el a haci malversacion na trabao. Tambe Fiscal ta acusa R.M.V. di a haci soborno o sea a accepta placa of regalo haciendo cosnan contra su trabao como Polis. Ademas Fiscal ta acusa R.M.V. di labamento di placa entre 13 October 2018 y 22 Maart 2023.
RECHAZA PETICION PA LIBERTAD
Abogado mr. de Sousa kende a defende R.M.V. a pidi Hues pa laga R.M.V. den libertad pendiente 21 di September 2023. Fiscal a bay contra e peticion aki. Fiscal ta haya cu e acusacionnan contra R.M.V. ta hopi serio y no por lag’e den libertad.
Hues a evalua un rato y a dicidi cu e ta rechaza e peticion pa laga R.M.V. den libertad. Esey ta nifica cu R.M.V. ta keda sera den KIA te dia 21 di September 2023 pa tratamento di e caso penal contra dje.