Home » Parlamentario Miguel Mansur, ACCION21: ‘Ta haci yamado urgente den carta dirigi na secretaria van Huffelen pa cumpli cu obligacion di derechonan humano igualitario’

Parlamentario Miguel Mansur, ACCION21: ‘Ta haci yamado urgente den carta dirigi na secretaria van Huffelen pa cumpli cu obligacion di derechonan humano igualitario’

by Admin
0 comment 104 views

 


ORANJESTAD – Parlamentario Miguel Mansur, lider di fraccion ACCION21 a dirigi un carta na secretaria di estado sra. Alexandra van Huffelen, subrayando e urgencia pa adresa e asunto di matrimonio di mesun sexo na Aruba, Corsou y Sint Maarten.

“A yega tempo pa Reino Hulandes cumpli cu su obligacionnan y sigura e realisacion di derechonan humano fundamental y libertad pa tur ciudadano, sin importa su orientacion sexual,” sr. Mansur ta expresa.

E carta ta respondiendo na conestanan di van Huffelen na Senador Dittrich, den cuadro cu e discrepancia entre e leynan actual di matrimonio y oblicacionnan fundamental pa loke ta derechonan humano. Esaki ta wordo subraya den Articulo 43 di Statuut voor het Koninkrijk der Nederlanden.

E enfasis akinan ta riba violacion di e convencion Europeo pa loke ta derechonan humano, na unda cu e tres paisnan no ta cumpli den ofrece matrimonio na parehanan di mesun sexo of union cu consecuencianan legal mescos. Limita parehanan di mesun sexo na geregistreerd partnerschap ta un solucion ‘separa, pero igual,’ sinembargo historia ta mustra cu un doctrina asina tin su origen den e era di ‘segregacion’ na Merca. Por ehempel hendenan color scur mester a sinta patras di bus, tabata arguenta cu e trato ta separa pero igual paso nan lo yega na e mesun destinacion pero awe nos ta reconoce esey como discriminacion institucionalisa.
Crucialmente, estudionan conduci na 2021 y 2022 ta revela cu e mayoria di ciudadanonan Arubano ta sostene matrimonio di mesun sexo, un 57% cu ta expresa nan sosten. E resultadonan aki, tambe agrega na e carta manera evidencia, a haya su reconocemento como un finalista den e REED Latino Awards 2022 na e categoria di Digital Survey y Nanotargeting – un acolada dentro di e mundo politico y comunicacion gubernamental.

E politica rond di e tema di matrimonio di mesun sexo na Aruba ta agrega complexidad den e asunto aki. E gobierno actual, forma pa Movimiento Electoral di Pueblo [MEP], tin un mayoria chikito brinda pa dos restzetel y gobierno no ta disfruta di loke ta e sosten mayoritario di votadonan Arubano. Mas ainda, e preguntanan cu fraccion di MEP ta trece dilanti den e raportahe di ley riba matrimonio di mesun sexo ta revela puntonan preocupante caminda e fraccion ta liga matrimonio di mesun sexo na ser maligno pa bienestar di mucha, contra ordo natural y detrimental pa bida psicosocial – un perspectiva desproba pa ciencia, medicina y cu base den prehuicio cu ta contradeci e deseonan di e poblacion Arubano.

‘Ainda ta persisti e falta di derechonan legal’
E caminda den progreso di derechonan LGBT+ na Aruba semper den historia a depende di accion na corte of eleccion di miembronan di e comunidad LGBT+ den oficina publico. Casonan exitoso manera Oduber-Lammers na 2006 caminda un pareha Arubano-Hulandes a bay corte pa registra nan acto di matrimonio na Censo. Mientras cu registracion di matrimonio di mesun sexo a wordo permiti, ela keda simbolico paso ainda ta persisti e falta di derechonan legal acerca.

E contesta di e secretaria di estado riba e pregunta si Reino su obligacion bao Articulo 43 inciso 2, ta wordo cumpli, ainda ta algo cu ta hopi anticipa. Adicionalmente, ta crucial pa tene den consideracion si e secretaria di estado ta na altura di estudionan y si ela combersa cu lidernan di fraccion na Aruba. Cual tambe ta trece claridad riba e factornan cu ta influencia nan posicion riba matrimonio di mesun sexo.


Considerando e ehempel cu Hulanda a duna na 2010, ora cu matrimonio di mesun sexo a wordo introduci sin reservacion na Bonaire, Saba, y Sint Eustatis, e pregunta imperativo segun sr. Mansur ta bira si extendiendo e solucion aki pa Aruba, Corsou y Sint Maarten ta alinea cu e obligacionnan cu tin para den Articulo 43 inciso 2. E debatenan rond di ‘neo-colonialismo’ no mester ciega e caminda pa igualdad y derechonan humano pa residentenan y miembronan di comunidad LGBT+ den e teritorionan aki. Si nos a siña algo di colonialismo ta cu miembronan di comunidad LGBT+ na e islanan CAS tin e mesun balor cu esnan na Hulanda y islanan BES y ta digno di e mesun derecho y proteccionnan. 


E yamado aki ta pa bini cu accion urgente pa rectifica e situacion actual, enfatisando cu progreso politico, como tambe igualdad berdadero solamente por wordo logra ora cu matrimonio di mesun sexo ta reconoci y protehi legalmente.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio