ORANJESTAD – Awe mainta Hues a condena Shanon Williams (22) na 17 aña di prison pa a tira Eddy Rincon Bravo mata den vecindario di tanki di Savaneta. Ademas di Shanon, e hoben K.L. tambe a wordo condena pa posecion di arma di candela.
ARUBA NATIVE por a compronde cu Hues a bisa cu e no ta kere e declaracion di Shanon cu e discusion tabata pa placa di droga. Hues a bisa cu tin testigonan cu a bisa cu Shanon a discuti cu Eddy pa placa di un arma di candela.
CONDENA PA POSECION DI ARMA
Por a mira presente den sala di Corte, e mayornan di e difunto y e ruman homber. Hues a cuminsa cu e sentencia contra e homber K.L.. Hues a bisa cu mescos cu Fiscal y abogado, e no ta haya proba e promer acusacion cu K.L. hunto cu Shanon a mata Eddy Rincon Bravo y tampoco cu K.L. ta envolvi den ladronicia cu violencia.
Hues a bisa cu e ta haya legalmente proba cu K.L. tabata den posecion di arma di candela y bala cayente. Pa cu e castigo, Hues a bisa cu e ta tene cuenta cu den pasado caba, K.L. a wordo condena pa posecion di arma di candela. Hues a enfatisa cu arma di candela ta peligroso y por causa loke a sosode cu e victima Eddy Rincon Bravo. Hues tambe a tene cuenta cu e raport di Reclasering cu ta conseha guia pa K.L.
CASTIGO
Hues a bisa cu e tin cu usa castigo hubenil y a condena K.L. na 15 luna di prison di cual 3 luna ta condicional cu 3 aña di prueba. Hues a ordena tambe pa destrui e arma di candela y e balanan cayente. Hues tambe a bisa cu K.L. tin dos castigo pendiente, castigo condicional, cu el a haci e delito aki durante su tempo di prueba. Hues a confirma e exigencia di Fiscal pa ehecuta e castigonan condicional. Ariba e 15 luna a bin 3 luna y 2 luna extra.
HUES NO A KERE SHANON
Pa loke ta Shanon, Hues a bisa cu el a analisa Shanon su unico declaracion duna den sala di Corte. Ta asina cu Shanon no kier a bisa nada na Polis. Hues a bisa cu e no ta kere Shanon su declaracion, mirando e pruebanan cu tin. Hues a mustra cu Shanon a declara den Corte ta cu el a bay na C. hunto cu Eddy pa busca su cen. Na e cas C., no tabata tey y Eddy a bisa Shanon pa bay cumpra cocaina. Segun Shanon Eddy despues di a purba e cocaina, cual Shanon a paga 50 florin p’e, el a bisa cu e cocaina no ta sirbi y no kier duna Shanon su 50 florin bek. A surgi un discusion cu a sigui den e auto di K.L. cu a culmina den sacamento di arma. Tabatin un luchamento caminda Eddy a tene e revolver na e loop y accidental un tiro a cay. Hues a bisa cu e declaracion aki no ta acceptable.
SHANON A TIRA EDDY MATA PA PLACA DI ARMA
Hues a bisa cu e ta haya e declaracion di K.L. y su amiga A., e testigo dama W. confiabel. El a mustra cu K.L. a declara cu Shanon a bis’e pa bay na di cas C., hunto cu Eddy. Den auto el a scucha Shanon ta papia cu Eddy di arma Glock. Eddy a puntra Shanon ta kende nan tin cu bay topa. K.L. a baha nan na cas di C. y bay. K.L. a topa C. den vecindario kende a reclama kico Shanon a bay cu Eddy na su cas. Ora K.L. a bay busca Shanon y Eddy, el a mira nan ta discuti. Eddy a bisa pa hib’e su cas pasobra e homber no tey. Shanon a cuminsa exigi pa Eddy saca placa den bon of malo. K.L. a wak Shanon saca un revolver for den un tas preto y keda bisa Eddy pa saca cen. Shanon na dado momento a dal Eddy cu revolver riba cabez. E ora ey Shanon a bisa K.L. pa no bay cas di Eddy y a bis’e unda pa core. Nan a bay den vecindario di tanki di Savaneta. El a mira cu Eddy tabata kier a bula for di bentana di auto y Shanon a tir’e y Eddy a cay pafor di e auto. Nan a baha y K.L. a mira Shanon a hinca e revolver den tas. K.L. a bisa cu el a mira Shanon listra den saco di Eddy y a coy un stapel di placa. K.L. a scucha Eddy a bisa Shanon bo a tira mi caba, bay cu e placa pero no mata mi.
TESTIGONAN
Hues a mustra tambe cu ora Polis a confronta Shanon cu K.L., K.L. a bisa Shanon pa djis bisa loke a pasa. E amiga di K.L., A., cu tabata sinta den auto dilanti, a bisa cu el a scucha Shanon a pidi Eddy e placa y Eddy a nenga pasobra e homber no tabata tey. Segun A., Shanon a bisa Eddy cu si no dun’e placa nan lo bin riba dje. Ta sea Shanon of Eddy. Hues a bisa Shanon cu for di e declaracionnan aki por conclui cu ningun momento tabatin discusion di droga. A. a bisa cu el a scucha un tiro y K.L. a puntra Shanon si el a mata Eddy. Shanon a bisa no. Nan a baha for di e auto y el a mira Shanon ta pidi Eddy pa e placa. Eddy a bisa cu bo a tira mi caba y bay cu placa. Shanon a zak banda di Eddy y coy placa.
Hues a mustra tambe cu e dama W. a bisa cu Eddy a bisa e y Polis cu ta Shanon a tir’e. W. a bisa cu el a mira Eddy benta abao y un persona para over di dje y bisa cu mi ta bay mata bo. Ora e auto a bay, W. a bay serca e persona benta abao y e persona a bisa cu Shanon a tir’e y hort’e. E madastra di Eddy a bisa cu el a duna Eddy 4500 florin. Hues a caba bisando cu e no ta kere declaracion di Shanon.
CASTIGO
Hues a bisa cu e ta haya legalmente proba cu Shanon a mata Eddy pa por haya e placa cu e tabata kier. Hues a sigui bisa cu no ta haya cu Shanon tabatin intension pa mata pero a tuma e riesgo cu door di tira, Eddy lo muri. Tambe Hues ta haya proba e ladronicia di Eddy. Hues a bisa cu e no ta sigur cuanto e suma cu Shanon a coy ta. No sa si ta 3 mil. Na opinion di Hues, e hecho cu no a haya Shanon cu placa no kiermen cu e no a horta e placa. Segun Hues, Shanon por a sconde e placa. Hues no ta haya proba cu Shanon a forza Eddy pa duna placa.
El a bisa cu Shanon a kita bida di Eddy pa placa. A laga e famia den tristeza. E momento ey por a mira cu e mayornan di Eddy a cuminsa yora. Hues a mustra cu den pasado Shanon a haya castigo pa posecion di arma caba.
Hues a condena Shanon na 17 aña di prison, kitando e tempo cu e ta sera den KIA. Tambe Hues a confirma e exigencia di Fiscal pa ehecuta e castigo condicional cu ta colga riba cabez di Shanon cu ta 51 dia y 6 luna di prison cu ta bay aserca. Hues a confirma e demanda di daño pa paga e gasto di entiero y pasashi cu a cumpra pa e tata bin Aruba. Hues a bisa cu e no por honra e demanda inmaterial pasobra e tipo di demanda cu a haci no ta reconoci na Aruba. E demanda di e madastra pa e haya e placa cu el a duna Eddy, Hues a bisa cu esey no por pasobra e ta un regalo. Tambe e cellular cu e madastra ta demanda pa e haya tampoco no por pasobra el a duna Eddy esey.