ORANJESTAD – Awe mainta e rumannan T.B. (24) y C.M.B. (22) a presenta dilanti Hues pa e caso penal cu Ministerio Publico a cuminsa contra nan. Fiscal ta haya nan culpabel di intento di mata un turista.
ARUBA NATIVE por a compronde cu Fiscal a baha pisa riba e rumannan B. y a exigi 7 aña di prison pa nan y cu nan mester paga e turista Canades Gitani mas cu 185 mil florin di daño.
Tratamento di e caso a dura te den oranan di merdia caminda via video conference e victima di Canada, S.Gitani a sigui e tratamento di e caso. Traductor a traduci pa e victima.
MALTRATO DI TURISTA
Hues a cuminsa cu C.M.B., kende a bisa cu for di principio el a admiti y ta mantene su declaracion cu e hunto cu su ruman T.B. a maltrata e turista, caminda a dal’e cu mokete y skop diferente biaha, hasta den cara. Ta asina cu T.B. tambe a admiti.
Hues a mustra cu segun relato di Polis, 26 December 2022 mas o menos 9’or anochi, asistencia a wordo pidi na e parkinglot patras Diamond International, banda di waf grandi. Eynan tin un persona cu a wordo maltrata y un auto a bay lag’e benta abao. Promer cu Polis a yega, nan a haya informacion cu e victima a bay Gate 5 di waf grandi. Polis a yega y constata cu e turista Gitani di e crucero a wordo maltrata. El a bisa Polis cu el a bay entrega su auto di huur pero e homber R. no tabata tey den e parkinglot patras di Diamond International. El a yama R. pa busca e auto y R. a bisa cu e ta na caminda. E turista a mira un auto reverse dal contra un otro auto staciona. E momento ey dos homber a bay riba dje y cuminsa maltrat’e sin ningun motibo y bay den auto. Promer Gitani no kier a bay hospital y tampoco haci denuncia sino bay den e crucero pa e wordo atendi. Despues Polis a bay bek y e señora di Gitani a bisa cu a dicidi di haci denuncia. E dokter di crucero a conseha pa mihor Gitani bay hospital pa haya tratamento. Ambulance a busca Gitani y hib’e hospital. E famia di Gitani a baha for crucero pa keda Aruba pa Gitani haya tratamento. Gitani a bisa cu ora e tabata warda R. el a mira dos homber y un muher na un auto. Na dado momento e auto a reverse y dal contra un otro auto para nan tras. E ta kere cu door cu e tabatin un cellular den man, nan lo a pensa cu e lo a filma y yama Polis. Pesey nan a maltrat’e. Segun Gitani, ora R. a yega, nan a core bay. Gitani a lanta y duna R. e yabi di auto. Despues el a cana bay na Gate 5.
Door di e maltrato, e turista a sufri hopi lesion severo na cara y no por a wordo trata debidamente na Aruba. Tabatin varios fractura na cara. Mirando e fracturanan, mester a bula bay Canada pa haya tratamento. Segun e victima, si R. no a yega, e no sa kico lo a para cun’e. El a sinti cu nan kier a mat’e. El a bisa cu e viahe di crucero tabata 7 dia pero di 2 dia el a wordo maltrata. El a perde e crucero y tambe avion pa bay bek Canada. Mester a cumpra pasashi nobo pa henter famia cu a sali 2500 dollar pa nan bay bek Canada.
RELATO DI DOKTER
Ta asina cu Fiscal a haya un relato di dokter na warda na Hospital cu ta mustra cu Gitani, a sufri sla na wowo y boca, sla na barica, nanishi hincha. Trauma severo na cara. Varios fractura na ambos banda di cara. E no por a sera su boca. Hopi dolor na su wowonan. Ful lomba ta blauw y tambe na nek marca blauw. E gasto di hospital na Aruba ta 3157 florin. Tambe na botica mester a cumpra 131 florin na remedi. Na otro botica 74,60 florin.
DAMA CHOFER A PARA MALTRATO
Polis a cuminsa un investigacion caminda a bay check video di seguridad di Diamond International por a mira kico a pasa. Pa 8.40 di anochi ta mira un auto blanco ta staciona den e parkinglot patras. Despues ta mira e auto reverse, dal contra un auto cu tabata para eynan. Despues e porta banda drecha ta habri y e chofer dama a bay wak patras kico a pasa. Despues e porta patras y e porta robez habri y dos homber baha y bay riba Gitani y maltrat’e. Nan tabata dal cu mokete y skop. E dama tras di stuur tambe a baha y a purba stop e dos hombernan di maltrata Gitani. E dama tabata ranca nan for di e turista y pusha nan den direccion di e auto y despues nan a bay. Riba un otro video di seguridad tambe Polis a mira e mesun cos.
DETENCION
A base di e videonan di seguridad a bay detene e dama chofer di e auto. Esey a sosode dia 30 di December 2022 na Pos Chiquito. Den promer instante e dama K. no kier a papia y te 4 Januari 2023 el a bisa e berdad. El a bisa cu el a sali cu e auto pa bay trip. El a bay busca T.B. y su ruman C.M.B. na cas di nan wela na Jan Flemming. Tambe el a bay busca su amiga L. Nan a bebe 2 boter di whisky y na dado momento K. mester a orina. Nan a bay den e parkinglot patras di Diamond International y K. cu su amiga L. a cana bay mas leu pa orina y a bolbe. Nan a traha drinks pa sigui bebe. Na dado momento nan a dicidi di bay y K. a reverse e auto y dal contra un otro auto staciona. A scucha un homber bisa algo. El a kere cu e homber lo a bisa algo malo, pasobra T.B. y C.M.B. a bay maltrata e homber. K. a baha for di auto y a bay ranca e dos rumannan y pusha nan pa bay bek na e auto. K. a bisa cu e no sa pakico e rumannan a maltrata e turista. Ta asina cu dia 2 Januari 2023 a detene T.B. y dia 4 Januari 2023 a detene C.M.B.
BO WOWO Y OREA POR GAÑA BO
E homber C.M.B. a bisa Hues cu bo wowo y orea por gaña bo. El a bisa cu nan tabata burachi y tabatin un bruhamento. Segun C.M.B. el a tende un hende a bisa algo y a sali cu su ruman pa bringa. Awor e ta realisa cu el a actua robez.
Segun T.B., e tabata bebi y a tende cu un hende lo a filma y a baha bay riba e homber. E no tabata sa cu ta turista y lo tabata filma. El a haya blackout y a bati e homber.
Ta asina cu C.M.B. a skirbi un carta den KIA na Ingles pa Hues. Hues a lesa e carta aki, caminda C.M.B. ta pidi disculpa na e turista pa loke a pasa. El a bisa cu e tabata burachi.
DEMANDA DI TURISTA
Gitani a manda demanda di daño di gastonan di hospital 1763 florin, gasto di crucero mas o menos 7000 dollar Canades, gastonan di pasashi mas o menos 4300 dollar Canades, 2300 dollar pa cumpra pasashi pa bay Canada. 249 dia e no por traha y ainda e no por. Demanda salario cu no ta hayando di 122 mil dollar. En total mas di 185 mil florin.