Den Haag – Entrenador di ADO Den Haag Giovanni Franken a haci un bishita di cortesia na Minister Plenipotenciario mr. Ady Thijsen.
Franken a cuminsa su carera profesional den futbol na FC Dordrecht, despues di a sigi e “jeugdopleiding” di Feyenoord. Tambe ela hunga pa RKC Waalwijk. Giovanni Franken a forma parti di e seleccion di Antia pa Campeonato mundial na 2006.
Na 2010 Franken a pone e carera di futbolista un banda y scohe pa ta entrenador. Na mei 2019 ela firma un contract cu ADO Den Haag pa e ekipo bou di 15 aña. Un aña despues ela pasa pa ADO Den Haag bou di 18 aña. Den zomer di 2021, Giovanni Franken a bira assistent-trainer di e seleccion di ADO Den Haag banda di entrenador principal Ruud Brood. Despues cu na februari 2022 ADO Den Haag a retira Brood, Giovanni a haya e encargo como entrenador principal ad interim di ADO Den Haag.
Finalmente Giovanni Franken tambe tabata entrenador di e ekipo nacional di Aruba na 2012, e aña cu Denzel Dumfries a haci su debut pa Aruba.
Giovanni Franke a bisa cu e ta spera di por ta un ehempel pa hobennan Arubiano. Den su combersacion cu Minister Thijsen ela trece dilanti cu lo ta bon si Arubahuis tin un functionario cu ta dedica su mes riba posibilidadnan pa nos hendenan den deporte.
Minister Thijsen a gradici Giovanni Franken pa su bishita, a desea Giovanni tur clase di exito como entrenador profesional y bisa cu Aruba ta orguyoso dje. Como aprecio pa su bishita Minister Thijsen a regala Giovanni un bunita dashi di Aruba.
