Awe diamars dia 13 di juni 2023, Aruba Ports Authority N.V. (APA) a marca un otro logro cu e bishita inaugural di Mardi Gras di Carnival Cruise Lines. Ta un crucero relativamente nobo, Carnival Cruise Lines a celebra su “maiden voyage” na fin di juli 2021. Mardi Gras ta e prome barco crucero di Carnival Cruise Lines cu ta opera riba LNG (Liquified Natural Gas), un combustibel mucho mas limpi.
E bishita di Mardi Gras a bin cu un record breaking den cantidad di pasahero. A trece un total di 6,348 pasahero, un cantidad cu ta surpasa e cantidad di pasahero mas halto pa un barco crucero aki na Aruba.
E bishita na Aruba
Mardi Gras a sali di Port Cañaveral na Orlando, Florida y ta riba un itinerario di no menos cu ocho dia. Despues di su bishita na Aruba, e ta pasa Corsou, Turks and Caicos y ta termina su ruta bek na Orlando, Florida. Aruba Ports Authority N.V. a ricibi e barco crucero Mardi Gras cu e tradicional water salute pa asina celebra e yegada inaugural na nos isla.
Prome bishita den hopi mas
Ademas di e water salute, a tene un ceremonia tradicional caminda a intercambia plakkaat cu e capitan di Carnival Mardi Gras. Marc Figaroa, CEO di APA, a entrega e capitan un plakkaat conmemorativo y alabes a yama tanto e capitan y su tripulacion un cordial bonbini na nos dushi isla Aruba. Carnival Cruise Lines ta e liña di crucero mas grandi na mundo y ta un di e socionan mas importante di Aruba pa loke ta trata e industria di turismo crucero.
Record den cantidad di pasahero
“Hopi satisfecho cu awe nos a ricibi 6,348 pasahero di Mardi Gras y tambe 4,904 pasahero cu Carnival Horizon, dus mas di 11,200 pasahero riba un dia cu sigur lo haci un contribucion importante na economia di Aruba. Mas cu claro nos ta mira e fecha aki tambe cu lo bay den historia pa motibo di e record estableci awe den cuadro di cantidad mas halto di pasahero riba un solo barco crucero, esta Mardi Gras”, asina Marc Figaroa, CEO di APA, a duna di conoce.
Tocante Mardi Gras
E crucero Mardi Gras ta opera door di Carnival Cruise Line. E ta e barco crucero lider di Carnival, bou di e categoria excel class y ta construi pa Meyer Werft na Finlandia. Dia 18 di december 2020 a entreg’e oficialmente na Carnival Cruise Line. Su waf di registro ta na Nassau, Bahamas. Mardi Gras ta den servicio desde aña 2021. E ta midi 344.5 meter y ta conta cu un total di diesnuebe piso. Su velocidad ta alcansa 23 nudo cu ta 43 kilometer pa ora. El a costa un total di 700 miyon Euro. Un cantidad di 2000 persona ta forma parti di e tripulacion di Mardi Gras. Su cruceronan “ruman” ta Carnival Celebration, Carnival Jubilee, AIDAnova, AIDAcosma, P&O Iona, P&O Arvia, Costa Smeralda y Costa Toscana.
Tocante Aruba Ports Authority:
A funda Aruba Ports Authority N.V. na aña 1981. E compania ta pertenece 100% di Gobierno di Aruba y tin 80 trahado den servicio directo. Hunto ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 330 crucero na Oranjestad y un otro 905 barco di carga na Barcadera (sin conta barkitos y launch services), prome cu e pandemia. E compania ta stabiel y ta bou maneho di Marc Figaroa.
