ORANJESTAD – Prome Minister Evelyn Wever-Croes ta felicita tur Filipino cu ta biba na Aruba y mundo henter cu e celebracion di nan di 125 aña di independencia di Spaña. Den e ultimo 20 añanan na Aruba, riba e fecha aki, ta hisa e bandera di Filipina na Wilhelmina Park, acompaña pa un acto ceremonial protocolario.
Prome Minister a expresa cu e comunidad di Filipina ta hopi conoci na Aruba pa ta hendenan servicial cu ta traha sumamente duro pa por progresa, y cu tin un curason grandi pa yuda otro. E ta un honor di por tin cada un di nan como residente aki na Aruba, yudando asina nos economia desaroya.
“Den nomber di Gobierno di Aruba, mi kier a felicita full e comunidad di Filipina riba e dia tan special aki. Danki na cada un di boso cu a laga boso hogar atras pa bin estableci na Aruba, yudando asina nos economia sigui draai. Aruba ta den recuperacion y esaki ta danki na tur esnan cu ta biba akinan. Nos ta spera cu tur esnan cu a kere den Aruba den bon y mal tempo por sigiu yuda desaroya nos pais” Prome Minister a expresa.
