Ministerio Publico a cuminza awe cu cobramento activo di debe di boet. Dos team di CEA (Cuerpo Especial Aruba) a subi caya awemainta tempran pa bishita hende na cas cu tin debe di boet y pa cobra e boetnan aki. CEA a bishita mas cu 30 adres awe, tanto pariba como pabao di brug. Un total di tres persona a keda deteni. Mayoria di hende a paga mes ora cu nan a haya CEA para na nan porta.
E accion lo continua henter e siman aki. CEA lo sigui bishita personanan cu debe di boet. Tur hende cu no paga nan boet of no paga nan boet por completo, lo wordo deteni y transporta pa KIA pa sinta e dianan di detencion (vervangende hechtenis) pa cual Huez a condena nan ora el a duna nan boet.
Ministerio Publico ta haci atrobe un yamada urgente na personanan cu debe di boet:
- Bo persona por paga online via cuenta bancario 4000905 di ArubaBank bao mencion di e parketnummer
- Bo persona por swipe cerca cahera di OM. NO TIN MESTER DI HACI AFSPRAAK
- Si Bo persona ta di pariba, por paga boet na Warda di Polis San Nicolas di 8’or di mainta pa 12’or di mainta E SIMAN AKI SO. Dos trahador di OM ta sinta cla na Warda di San Nicolas pa atende bo persona
- Bo persona por paga cu CASH tambe E SIMAN AKI SO.
Especialmente pa e accion aki, Ministerio Publico ta habri non-stop e siman aki tur dia di 08.00’or di mainta pa 15.30’or di atardi. Cu excepcion di diabierna ora OM ta habri te 12.00’or di merdia. Dus riba diamars, diaranzon y diahuebs bo persona por acudi na OM durante lunch tambe. NO TIN MESTER DI HACI AFSPRAAK, bo persona por gewoon cana drenta.