Home » WEGANAN ESCOLAR 2023 TABATA UN EXITO ROTUNDO

WEGANAN ESCOLAR 2023 TABATA UN EXITO ROTUNDO

by Admin
0 comment 109 views

Masha pabien na e scol- y alumnonan pa participa y engrandece Weganan Escolar

ORANJESTAD: Diabierna ultimo, na Joe Laveist Sport Park a tuma luga clausura di Weganan Escolar 2023. Aruba por mira atras na dos siman di deporte escolar sumamente exitoso. Weganan Escolar ta un proyecto presenta pa Ministerio di Enseñansa y Deporte, IBISA y Gabinete Wever – Croes II. Presente na ceremonia di clausura tabata Minister di Enseñansa y Deporte Endy Croes acompaña pa su kerida esposa, Vice Presidente di Parlamento sr. Raymond Kamperveen, Parlamentario Alvin Molina, representante di diferente fundacion- y federacionnan como tambe representante di directivanan di scol, cabesantenan di scol y demas invitadonan special. E atardi ta inicia cu e final di futbol di scol preparatorio den categoria mucha homber, unda cu Mon Plaisir Kleuterschool a titula campeon di Weganan Escolar 2023. Despues a sigui cu e partido final di futbol den categoria di mucha muhe, unda cu Arco Iris Kleuterschool a logra e titulo maximo di campeon. Despues di e partidonan sumamente interesante e ceremonia di clausura a inicia cu himno nacional di Aruba a interpreta pa Rocco Franken, despues a sigui discurso di Minister di Enseñansa y Deporte Sr. Endy Croes. NTG & NLG bou guia di Marisol Peña a presenta un bunita show di clausura. Tambe a entrega premio na e scolnan ganado y e hungado di mas valioso. Entretenimento tabata den man di dj Spike y Groove Masters cu nan tremendo musica y a pone un ambiente total na San Nicolas. Mascota Wiwi tabata presente y a saca potret cu e muchanan.  Tambe pa e muchanan tabatin entretenimento di dino jump, cu cantidad di tent di e.o. cuminda, bebida, popcorn y cotton candy. Durante e anochi tabatin diferente premio atractivo di, entre otro, The Healthy Way Aruba.
Dos siman di competencia escolar cu a inicia dia 26 di mei y a culminda dia 10 di juni. Un total di 45 scol y alrededor di 1000 alumno di scol preparatorio, basico y secundario di Aruba a enfrenta otro den un competencia amistoso den shete (7) diferente disciplina, entre otro, badminton, functional fitness, volleyball, basketball, futbol, beach tennis y baile deportivo.
Meta di Weganan Escolar Aruba ta pa promove deporte bou di e alumnonan di scol preparatorio, basico y secundario. Minister Endy Croes semper a enfatisa cu deporte ta e vehiculo pa preveni cu e muchanan ta bay riba caya. Hunto nos ta logra un comunidad mas saludabel y activo y nos ta desea tur mucha y hoben cu ta participa den Wegannan Escolar 2023 hopi exito. Sigur tabata bunita pa presencia e alegria y entusiasmo di e hobennan pa competi cu otro cu e speransa pa fortifica laso di amistad y hermandad.

Concluyendo, Minister Endy Croes ta gradici IBISA, Ministerio di Enseñansa y Deporte, FFD, FLPD, SSA y Gabinete Wever – Croes II cu a inverti y haci Weganan Escolar 2023 posibel. Tambe, mandatario di Enseñansa y Deporte ta gradici directivanan di scol, cabesante y docentenan di gym pa sostene e proyecto. Danki na e mayornan cu ta apoya y sostene nan yiu den nan deporte faborito. Deporte ta trece union!

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio