ORANJESTAD – Prome Minister Evelyn Wever-Croes hunto cu Minister Endy Croes a ricibi Brainer Lampe, Gerald Moretta y Disjondrick Jacobs pa asina entrega nan un reconocemento pa nan hazaña inmenso durante Ronde van Aruba, cu ta e evento di careda mas grandi di Aruba. E atletanan Brainer Lampe y Gerald Moreta a haci Disjondrick su soño bira un realidad pushando su race cart durante full e trayectoria.
Prome Minister a indica cu pa Gabinete Wever-Croes, inclusion ta un prioridad, y cu ta bunita pa wak con e atletanan aki a duna tur di nan mes pa asina haci e soño di Disjondrick, cu ta un hoben cu ta sufri di Celebral Palsy, y no por move riba su mes, un realidad. Actonan asina ta merece wordo reconoci, y pa e motibo aki, Prome Minister y Minister di Deporte a invita nan hunto cu Disjondrick, riba fecha natal di Disjondrick pa duna nan e reconocemento bon mereci. Tambe a tuma e oportunidad di canta happy birthday pa Disjondrick, den compania di su atletanan.
E atletanan Brainer y Gerald, a expresa di ta hopi emociona cu e reconocemento aki. Pa nan training hunto cu Disjondrick ta algo normal, pero pa mira cu mas hende y minsiternan ta reconoce e acto aki, ta duna nan un sentimento di gratificacion y estimulo pa sigui pusha y duna tur di nan mes pa continua cu e deporte importante aki. Pa nan esaki tabata un experiencia nobo y unico y e sentimento di yega den ekipo te final tabata uno hopi emocional. E idea di esaki a bin di Disjondrick mes pa mustra tur hende cu limitacion fisico no mester ta un impidemento pa logra metanan asina, y manera Disjondrick mes ta bisa “nada ta imposibel”.
Prome Minister ta sumamente orguyoso di e Brainer y Gerald pa cumpli cu Disjondrick su deseo pa mustra comunidad di Aruba cu no ta importa ki limitacion un persona por tin, si bo tin un ekipo bo tras, tur cos ta posibel.