North Carolina, Merca:
Ted Kaczynski, di 81 aña yamá ‘Unabomber’, a muri. Kaczynski a mata tres persona y a herida 23 otro pa medio di cartanan contene bom (bombrieven) entre 1978 y 1995.
Diasabra mainta Kaczynski a wordo haya for di tino den su cel. E tabata encarcela na un prison na North Carolina unda e tabata ricibi atencion medico special. Kaczynski a wordo transporta pa hospital, pero na su yegada dokter a constanta su morto.
Ted tabata wordo considera un di e delicuentenan mas siniestro di Estados Unidos. Despues cu Kaczynski a logra haya su diploma na Universidad di Harvard y a traha algun aña como profesor di wiskunde, Kaczynski a cuminsa bay contra e sociedad moderno di añanan 70. E la bay biba aisla den un cas na e estado di Montana y unda e la cuminsa cu un campaña terorista contra hendenan cu segun su persona ta desaroya tecnologia moderno y asina ta destruí naturalesa.
Unabomber a muri cu hopi odio y segun su persona tabata pasa su dia den prison ‘mas malo cu Guantanamo Bay.’ Na 1995, den un ensayo di 35,000 palabra cu el a manda entre otro pa e corant The New York Times, el a splica su motibonan. E nomber “Unabomber” a wordo inventa pa e servicio di seguridad mericano FBI, un combinacion di “university and airline bomber.” Su targetnan inicialmente tabata personanan cu ta relaciona cu universidadnan. Despues su target a bira tambe e aerolineanan.
Despues di un persecusion di casi dos decada, Kaczynski a wordo aresta na 1996. El a wordo condena cu levenslang y sin posibilidad di por sali liber.