Inscripcion pa aña escolar 2023-2024 a habri na Avondmavo.

Oranjestad- Directiva di Stichting Avondonderwijs Aruba (SAA) kier a informa e comunidad di Aruba cu te cu dia 6 di juli tin e posibilidad pa inscribi pa e aña escolar nobo na Avondmavo.
Avondmavo ta brinda diferente trayecto na unda e alumno por logra su Mavo-diploma banda di su trabou, famia y otro actividadnan.
E lesnan di Avondmavo ta tuma luga durante oranan di anochi di 6pm pa 10pm di dialuna pa diahuebs na Playa, San Nicolas of online. E trayecto online ta specialmente pa esnan cu tin dificultad pa ta presente fisicamente na scol. Esaki por ta e.o. pa mamanan cu no tin hende pa yuda nan keda cas cu nan yiunan of personanan cu limitacion fisico.
Pa esnan cu kier caba den 2 aña en bes di 3, Avondmavo tin e Fast-Track traject. Esaki ta pa alumnonan cu motivacion halto cu ta dispuesto pa traha duro y logra e puntonan stipula pa por bula di aña 2 pa 3 despues di nan prome rapport.
Tambe Avondmavo ta brinda e posibilidad pa haci algun materia en bes di tur 6 of 7 den un solo biaha. Esaki ta specialmente pa alumnonan den aña 4 y ta brinda e oportunidad pa e alumno studia na su mesun liheresa.
Prome cu inscribi nos ta conseha pa pasa door di e exigencianan pa por drenta Avondmavo. Riba nos website www.avondmavoaruba.com por lesa loke ta necesario pa drenta Avondmavo.
Inscripcion ta tuma luga online via nos website y pa inscribi mester di e siguiente rekisitonan:
– Papel di Censo (5 florin)
– Copia di ID valido
– Copia di ultimo rapport/lista di cifra/diploma
– Prueba di pago di schoolgeld
Pa cualkier informacion por tuma contacto cu oficina di Avondmavo na telefoon: 583-3779 of por pasa personalmente na oficina na Playa na unda nos ta cla pa yuda bo. Oficina ta habri di 8:00AM pa 4:30PM y ta situa na edificio di EPI.
Directorado Avondmavo