Home » Lider di Fraccion di AVP, mr. Mike Eman: URGENTE PA SCUCHA GREMIONAN RIBA 7% BBO NA FRONTERA

Lider di Fraccion di AVP, mr. Mike Eman: URGENTE PA SCUCHA GREMIONAN RIBA 7% BBO NA FRONTERA

by Admin
0 comment 74 views

Inicialmente no tabata conoci kico berdaderamente e impacto di e 7% BBO na frontera lo bai ta. Den e confusion aki gobierno a keda pusha e ley aki como un cambio cu menor concecuencia pasaobra supuestamente esnan cu paga e 7% lo haye bek. Awor tin un realisacion mas grandi cu e presentacion aki ta uno eroneo y cu e concecuencia ta bai ta devastador pa e consumidor, e empresario, turismo di Aruba, su prijs y su calidad y finalmente pa henter e desaroyo socio economico di Aruba. Pesey fraccion di AVP ta haya urgente pa scucha e gremionan y pa e motibo ey a haci un solicitud pa trece gremionan den Parlamento den un “hearing” publico pa pueblo tambe por scucha, asina e lider di oposicion, mr. Mike Eman a accentua despues cu ya e tin lunas ta adverti pa concecuencianan di e 7% BBO na frontera. 

 

E conseho di RAAD VAN ADVIES ariba e introduccion di 7% BBO na frontera ta cla y directo: efectonan lo ta devastador pa poder di compra, inflacion, clima di inversion, turismo y nos economia en general. Raad van Advies ta hasta cita Banco Central cu ta pronostica un caida real den nos economia pa anja 2023. Esaki ta e promer reaccion di e lider di oposicion, mr. Mike Eman, despues di a haya e ley di 7% BBO na frontera Diabierna ultimo y a studia e conseho di Raad van Advies.

Fraccion di AVP a studia e Belastingplan 2023 y conseho di Raad van Advies riba e introduccion di 7% BBO na frontera y demas cambionan fiscal proponi door di Gobierno. Raad van Advies ta expresa preocupacion grandi pa e impacto negativo cu e cambionan proponi lo tin riba economia di Aruba y e calidad di bida den nos comunidad. Fraccion di AVP ta solicita un reunion den Paralmento pa scucha tur gremio.

Raad van Advies ta mustra cu e introduccion di 7% BBO na frontera lo aumenta inflacion mas ainda y lo afecta e clima di inversion na Aruba cu lo stanca crecemento di nos economia. Aumento di impuesto lo aumenta costo di bida y na mes momento disminui e poder di compra di nos ciudadania. E resultado ta cu lo empeora e empobrecimento alarmante na Aruba. 

E falta di consideracion cu gobierno ta demontra cu bienestar publico ta escandaloso y sin precedente. Pa e motibonan aki, mr. Mike Eman ta bisa cu su fraccion ta solicita cu urgencia un Openbare Bijeenkomst cu FTA, SEPPA, STT, ABV, SIWA, SADA, CAMARA DI COMERCIO, Comerciantenan Unie, SNBA, ATTIA, AHATA, ATA, RESTAURANT ASSOCIATION, TIMESHARE ASSOCIATION, Aruba’s Jewelers Association y demas gremionan sindical, comercial, prome cu entrega pregunta. Di e forma aki nos lo por inclui nan preocupacion y observacionnan pa cu e introduccion di e 7% BBO na frontera. 

E lider di oposicion, mr. Mike Eman ta accentua cu e sitiacion ta hopi grave y nos pueblo no por carga mas medidad. E 7% BBO na frontera riba tur e medidanan caba, manera Raad van Advies ta adverti, ta bai afecta tur hende severamente! 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio