[Oranjestad, 4 juni 2023] – ELMAR a experiencia un interupcion di coriente den un parti di San Nicolas y Savaneta awe durante oranan di marduga pa motibo di un corto circuito den nos red di distribucion. Esaki a sosode durante e heat wave cu a causa un impacto grandi riba consumo di coriente, pasobra nos ta depende di coriente pa enfrenta e calor intensivo.
Aruba, actualmente den su temporada di calor, a experiencia un crecemento significante den uzo di coriente. Durante weekend, e demanda a yega un peak di 135.4 MW, reflehando e esfuersonan di nos clientenan pa mantene nan mes fresco y comodo. Sinembargo, un crecemento asina rapido den consumo di coriente ta pone un carga mas pisa riba nos kabelnan di distribucion, aumentando e posibilidad di corto circuito.
Diariamente Aruba ta experiencia un peak di consumo di coriente rond di 3 pm te cu 4 pm y di 9 pm te cu 10 pm. Oranan aki ta coincidi cu un grupo di di hende cu posibelmente ta bolbe cas despues di trabou of cu ta prepara pa drumi, cual ta intensifica e presion riba nos kabelnan di distribucion.
Aña pasa nos a yega e peak di consumo di coriente di aña na 137.6 MW durante september (e luna di mas calor di aña), mientras cu e aña aki nos a yega un peak di consumo di coriente na 135.4 MW aworaki caba na juni. Esaki ta un desafio cu nos ta confronta na momento cu e temperatura ta aumenta y cu e consumo di coriente ta subi diripiente.
Durante e lunanan mas fresco cu nos a caba experiencia recientemente, nos a presencia un minimalisacion den interupcion di coriente. Ya cu durante e lunanan aki e kabelnan di distribucion a keda exponi na un carga mas abou.
ELMAR ta haci expansion continuamente di su red di distribucion pa acapara e demanda creciente, alabes haciendo su maximo esfuerzo pa cumpli cu e demanda halto di coriente durante e dianan calor aki. Nos ta gradici pa cu e comprension pa e sucedido di awe marduga.