Rooi Santo – Diabierna mainta na un sitio di construccion na Rooi Santo un homber a bira malo y sak den otro.
Mesora ta notifica ambulance y despues polis.
Na yegada di Paramediconan mucho cos mas no por a wordo haci pa e homber Venezolano(53), cu segun nos a compronde lo ta sufri di presion halto.
Ta wordo bisa cu e dianan calor cu nos ta experenciando ariba nos isla lo por a hunga un rol den e incidente lamentabel aki.
Slachtofferhulp y tambe Dr. Texier a presenta na e sitio, y mas despues shersh di un cas funeral a presenta pa hiba e curpa.
E homber Luis A. Aular naci na Punto Fijo di 53 aña ta laga 5 yiu atras y su señora.
Tur esnan cu di un of otro manera mester traha den solo, te cuenta si bo ta sufri di presion halto/curason esaki por tin consecuencia serio si bo no ta cuida. Bebe fielmente bo remedi di presion, pa evita bira malo.
Tambe mester bebe suficiente likido, y trata na keda mas hopi posibel den fresco.
Nos kier extende palabranan di condolencia na famia di e fayecido.
