ORANJESTAD: Diamars atardi, Weganan Escolar a continua na Compleho Deportivo Frans Figaroa den e disciplina di Futbol B Mucha Homber. Ganado di poule A: Colegio Sagrado Curason y ganado den poule C: St. Fransiscus College. Ambos scol a clasifica pa e final cu ta tuma luga dia 8 di juni. Den poule B tin un empate entre Cacique Macuarima School y Pius X School y diahuebs awo, dia 1 di juni ta bay hunga un wega di desempate pa determina e scol ganado di poule B. Durante e dianan binidero tin mas competencia entre e scolnan preparatorio, scol basico y scol secundario.
Minister di Enseñansa y Deporte Endy Croes ta desea tur scol cu ta participando den e competencia di Weganan Escolar 2023 hopi exito. Alabes ta invita henter Pueblo di Aruba pa bin duna sosten na nos mucha- y hobennan den diferente disciplina durante e dianan binidero. Alabes Minister Endy Croes ta invita pueblo di Aruba pa e clausura di Weganan Escolar 2023 cu ta tuma luga dia 9 di juni cuminsando pa 5:30 PM na Joe Laveist Sport Park na San Nicolas. Tambe, pa e competencia di Baile Deportivo y Cultural cu ta tuma luga di 10 di juni pa 5:00 PM na Aruba Entertainment Center na Dakota.
