Durante e ultimo dianan nos por a tuma nota di un calor extenso, temperatura hopi halto y un solo fuerte. Durante e dianan cu ta sigui comunidad por bay sigui experencia esaki cu por ta peligroso pa nos salud. Pa combati e fenomeno di naturalesa aki no ta posibel, pero si nos por tuma accion pa proteha nos mes y otronan y tambe preveni consecuencianan pa motibo di e calor extenso.
Nos por papia aki di un heatwave of cu otro palabra un ola di calor cu tin su efecto riba hende y bestia. Riba hende e tin efecto specialmente riba e personanan cu un enfermedad cronico manera, diabetes, presion halto, cancer, asthma, pero tambe esnan cu nan trabou ta fisicamente pisa y pafo. Otro grupo di riesgo ta hende grandi, baby, muchanan chikito, hende cu sobre peso y obesidad . Calor por ocaciona deshidratacion, zonontsteking, presion halto, dolor di cabes, cansancio, biramento di cabes y stoma, sacamento, cram di musculo y asta ataca serca un persona cu ta den e temperatura cayente pa un tempo largo.
Departamento di Salud Publico ta conseha comunidad pa durante e dianan cu ta sigui pa bebe hopi awa por lo menos 2 liter pa dia, uza protector solar SPF 30 of mas, bisti bril di solo, pechi of sombre, paña di color cla preferibel di catuna of linen y evita bebida cayente y bebidanan cu ta contene cafeina of hopi sucu durante e oranan mas calor cu ta entre 11:00 di merdia pa 2:00 di atardi.
Nos muchanan, enfermonan y nos hende grandinan ta esnan mas vulnerabel pa e calor aki. Ta hopi importante pa vigilanan constantemente y refresca nan curpa pa wanta e temperatura abou y hidrata nan cu suficiente likido pa evita un posibel heatstroke, cu ta un condicion hopi delicado caminda cu e curpa ta stop di soda. E temperatura di curpa ta sigui subi mas cu 40° grado Celsius y ta perhudica e centro di control cu ta regula e temperatura corporal den nos celebro.
𝐒𝐢𝐧𝐭𝐨𝐦𝐚𝐧𝐚𝐧 𝐝𝐢 𝐮𝐧 𝐡𝐞𝐚𝐭𝐬𝐭𝐫𝐨𝐤𝐞 𝐭𝐚
• Temperatura corporal halto den corto tempo
• Cara y cuero cora y seco
• No ta soda mas
• Curazon ta bati dura
• Dolor di cabez
• Mente ta bira confuso y por cay flow
• Por cuminsa saca of haña diaree
𝐊𝐢𝐜𝐨 𝐩𝐚 𝐡𝐚𝐜𝐢 𝐝𝐞𝐧 𝐜𝐚𝐬𝐨 𝐝𝐢 𝐮𝐧 𝐇𝐞𝐚𝐭𝐬𝐭𝐫𝐨𝐤𝐞?
• Busca asistencia medico mesora yama 911
• Tene e persona trankil y den fresco
• Los e pañanan na su curpa.
• Fria e curpa cu un serbete/paña muha (cu awa friu of di cranchi)
• Por pone ijs of icepack bou di brasa, na nek, lomba, riba stoma y/of memey di e pianan.
• Si persona ta consciente lag’a bebe awa no mucho friu.