Home » Parlamentario Marco Berlis (MEP): E realidad di e ceramento di John Wesley College

Parlamentario Marco Berlis (MEP): E realidad di e ceramento di John Wesley College

by Admin
0 comment 191 views

John Wesley College, un MAVO historico cu a haci un impacto grandi y positivo den sociedad

 

Recientemente nos por a wak Mike Eman hunto cu dos colega di partido sali pa cuestiona y supuestamente “salba” John Wesley College. Un cos cu mi a siña hopi liher como politico nobo ta, cu e strategia di politica cu ta wordo uza pa e partido berde, no tin compromiso cu integridad ni e berdad. Manera nan ex-coleganan a divulga recientemente, AVP ta sali papia riba un tema sin splica con e asunto ta hinca berdaderamente den otro y sin prueba na man. AVP ta sali duna un informacion mita berdad, pero cu ta un mentira completo. Esaki ta un “practica comun” pa AVP. Ta pesey ta keda importante pa keda brinda na pueblo e informacion corecto pa tur por compronde kico ta pasando.

 

CBS a informa gobierno cu tin un bahada grandi di e cantidad di mucha na Aruba

Personalmente mi ta kere cu John Wesley College (JWC) ta un scol historico y di hopi bon reputacion, pero cu a cay victima na un factor cu CBS a bin ta alerta nos pueblo y gobierno riba dje caba pa basta aña. Den varios presentacion den Parlamento CBS a informa cu famianan no ta traha suficiente yiu pa yena nos scolnan na Aruba. Esaki ta e motibo principal pakico varios scol ta enfrentando retonan grandi pa keda habri. Gobierno por duna subsidio, sinembargo ora tin poco studiante e scol no ta bira sostenibel mas. Adicionalmente, mester remarca cu basta mucha di San Nicolaas ta bay scol pabao di brug.

 

JWC no ta scol di Gobierno pero di SPCOA

Prome cu mi a drenta politica tampoco mino tabata sa con e diferente fundacionan manera SKOA, SPCOA y otronan, y e maneho di DPS ta funciona. DPS ta e unico grupo di scolnan cu ta cay bao di gobierno directamente y unda gobierno por dicidi prijs di schoolgeld y interveni pa cualkier reto cu tin. Den e caso di SKOA y SPCOA por ehempel, esakinan ta stichtingnan cu ta maneha y dicidi tur cos pa nan mes. Aunke gobierno ta subsidia algun cos, esaki no ta significa cu gobierno por yega dicidi algo den e stichtingnan aki. Gobierno por sinta na mesa pa haya informacion y dialoga, sinembargo gobierno no tin e autoridad pa mete oficialmente ni huridicamente. Pe motibo aki gobierno no por intermedia den e caso di JWC, pasobra simplemente no tin suficiente alumno pa JWC y pasobra SPCOA a dicidi pa cera e scol. SPCOA lo habri clasnan extra pa acomoda alumnonan di JWC na Mon Plaisir Mavo si ta necesario. 

 

Nochi di Informacion cu mayornan y cabesantenan di otro scolnan

Diaranson 19 di April JWC a organisa un reunion cu tur e mayornan di studiantenan pa informa cu e scol ta bay cera y e motibonan pakico esaki a sucede. Despues di a contesta preguntanan di mayornan, cabesantenan presente di Abraham de Veer, Filomena College y Mon Plaisir tabata presente cu formulario pa mayornan por a inscribi nan yiu inmediatamente na e scol di nan preferencia. JWC a bin ta baha den cantidad di alumno structuralmente; 2016-2017; 227 alumno, 2017-2018; 159 alumno, 2018-2019; 165 alumno, 2019-2020; 125 alumno, 2020-2021; 115 alumno, y 2022-2023; 64 alumno. Nos por constata e ora cu JWC a bay atras cu 163 alumno!

 

Mike Eman kier uza JWC pa hunga un politica barata sensacionalista

Mi ta haya hopi tragico y baho cu Mike Eman awor ta bay cana den JWC hunga cu emocion di e muchanan. Uzando su “politica di decepcion comun,” pasobra Mike Eman sa bon cuantor tin, pero kier uza e ocasion aki pa acusa gobierno di algo cu no ta den nan poder pa haci. Esaki ta e realidad comun di Mike Eman, cu no por salba ni su mesun negoshinan den pasado, ni su mesun partido actual, manda nos pais bancarota y awor kier uza e ocasion aki pa capitalisa politicamente sin tin un poco compasion di e studiantenan, mayornan y maestronan. Esaki ta e “bon comun” cu Mike Eman ta papia di dje?

 

Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio