Den Haag – Minister Plenipotenciario mr. Ady Thijsen a reuni na Aruba cu Prome Minister mr. Evelyn Wever-Croes. Na e ocacion aki Minister Thijsen a duna e Prome Minister un relato riba su vision pa Arubahuis y Aruba na Hulanda y kico su maneho ta encera, desde cu ela keda nombra como Minister Plenipotenciario na Hulanda y alabes Representante di Aruba na Union Europeo.
E mandatario a bisa cu e kier fortifica e lasonan tanto na Den Haag, como na e municipionan, provincianan, instituto importante pa Aruba manera Raad van State, cerca Hogescholen y Universidadnan. Tambe estrecha e relacion cu embahadanan na Hulanda cu por conduci na formanan di cooperacion cu ta na beneficio di Aruba. Minister Thijsen a haci entrega di un documentacion cu ta ilustra tur e contactonan cu e tabata tin den e delaster lunanan y riba cual tereno a papia pa yega na cooperacion. Sr. Thijsen a bisa Prome Minister Wever-Croes cu tur e trabao aki ta danki na e cooperacion y sosten di e personal di Arubahuis. Pa es motibo aki e mandatario a bisa cu pa Arubahuis por sigi haci e tremendo trabao aki lo mester di mas inversion tanto material como inmaterial den e instituto Arubahuis.
Prome Minister Evelyn Wever-Croes a gradici Minister Thijsen pa e update di su trabao y cu tur loke te ainda ela realisa na contactonan y terenonan cu por conduci na formanan di cooperacion den future. Tambe premier Wever-Croes a bisa di ta apoya Minister Thijsen den su vision y maneho pa haci Arubahuis y Aruba mas visibel na Hulanda, Europa y Internacional.
Nota pa redaccion: E potretnan ta cortesia di Arubahuis