FELIZ DIA INTERNACIONAL DI ENFERMERIA

ORANJESTAD – Dia 12 di mei ta dia internacional di enfermeria, un dia pa reflexiona y bisa danki na nos enfermero/a nan. E dia aki ta basa riba e fecha di nacimento di e fundado di enfermeria moderno, esta Florence Nightingale. E aña aki e tema di World Health Organization (WHO) pa cu e dia special aki ta, “Our Nurses Our Future”.
Minister di Turismo y Salud Publico sr. Dangui Oduber ta expresa su aprecio pa tur cu ta traha den enfermeria. Nan labor ta bisto entre otro den Hospital, Imsan, centronan di cuido di nos grandinan, den ambulance, oficina di dokternan di cas y specialistanan, Wit Gele Kruis y laboratorionan. Trabou di un enfermero/a no ta facil. Pa nos pashentnan e enfermeranan ta esnan cu ta percura pa nan come, bebe y tuma nan medicamentonan na tempo. Boso empeño y dedicashon ta di suma importancia pa determina e calidad di cuido cu nos pashentnan ta ricibi.
Minister Oduber semper lo ta gradicido pa e cooperacion cu e la ricibi di tur esnan cu ta traha den cuido, e pandemia a bin cu un crisis inespera pero hunto nos a sali di esaki. E gobierno aki lo sigui zorg pa semper tin suficiente profesionalnan disponibel den e funccion importante aki. Minister Oduber su vision ta pa sigui mehora e calidad di cuido aki na Aruba aun mas.
Minister Oduber ta manda palabranan di pabien na tur nos enfermero/a nan y yama nan danki pa dedica nan bida na yuda otronan y tambe danki pa comparti nan compasion, expertisio y confiansa. Nos enfermero/a nan ta e weso di lomba den Salud Publico.
Un gradicimiento di curason pa tur boso excelente trabounan cu boso ta haci pa nos comunidad. Un trabou noble cu boso ta haci cu curason grandi.
Como Minister di Salud Publico nos tin gran aprecio pa boso profesion. Masha danki!