ORANJESTAD – Diasabra atardi, a bini hunto pa inaugura e plaza, cu yama plaza Tino Ruiz y a rindi honor na Agente Policial Tino Ruiz den feliz memoria y su famia.
Tino tawata un polis ehemplar, dedica na su trabou, bo por bisa te hasta cu e tawata biba pa su trabou. No obstante, cu kende bo papia den Cuerpo Policial, di su coleganan riba pia di trabou te cu alto mando, tur lo confirma esaki. Nan lo bisabo tambe cu Tino semper tawata servicial y ta haci su trabou cu empatia.
Agentenan Policial ta mas cu un persona den uniform. Nan ta tata, mama, ruman, yiu. Pues ta tur dia un tata, mama, ruman of yiu di un di nos ta pone nan bida na peliger y haci sacrificionan grandi pa sirbi y protehe nos comunidad.
E uniform cu cada Agente Policial ta bisti, ta trece un peso enorme cune, y hopi bes nos no ta realisa e impacto grandi cu e trabou aki tin riba e Agentenan Policial y riba nan famia.
Cada bes cu un sirena zona of un noticia sali, e telefon di e agente policial ta zona. Y no ta Centrale Post ta yama, pero ta un ser keri di e Agente Policial ta yame pa ta sigur cu e ta bon y nada a pasa cune.
Famianan di e Agentanan Policial como tambe e Agentenan Policial ta consciente di e retonan y peligernan, pero asina mes nan a scoge pa haci e trabou noble aki. E peligernan ta scondi den cada skina. Pesey pa por eherce e trabou aki e ta rekeri profesionalismo, pasenshi, dedicacion y pasion. E ta un yamada!
E yamada aki ta bin cu su prijs. Manera mi a indica caba e sacrificionan ta grandi.
Cada biaha cu nos Agentenan Policial subi warda, nan y nan famianan, tin un deseo. Esey ta pa nan regresa cas bek sano y salvo. Asina mes, na 2017, apesar cu nos ta consciente di e peligernan, nos a wordo confronta cu e hecho cu Tino, Tino su famia, y su coleganan a paga e prijs maximo, Tino no a regresa su cas despues di su warda.
A menciona cu pa por eherce e trabou aki e ta rekeri di profesionalismo, pasenshi dedicacion y pasion. Pero tambe hermandad.
Pues, e famia aki, cu yama Cuerpo Policial, a demostra caba con nan a surpasa retonan cu tawata mustra imposibel. Cuerpo Policial a sigui brinda servicio despues di e perdida di nan colega stima cu e mesun dedicacion di semper, y esaki tawata posibel door di e hermandad cu ta reina.
Y pesey e ta nos deseo cu e plaza aki, no solamente por percura pa Cuerpo Policial haya e balor cu nan merece den nos comunidad completo, pero tambe, pa cada ciudadano wordo recorda cu e trabou di Cuerpo Policial no ta uno facil y cu nan tambe ta tata, mama, ruman y yiu.
Mas aun, pa e memoria di colega Tino Ruiz por fungi tambe, pues e plaza aki, como e simbolo pa sigui cultiva e hermandad den Cuerpo Policial.