99
ORANJESTAD – Dia 1 di mei 2023 ta recorda e hecho cu hopi aña pasa, esta na 1890, a start e lucha di trahadonan pa un mehoracion di nan condicionnan di trabou.
Bastante progreso a logra desde e tempo ey pa e clase trahado, pero ainda falta hopi cos pa mehora den e relacion di trabou entre dunado di trabou y su trahadonan.
Ta Departamento di Labor y Investigacion (Directie Arbeid en Onderzoek – DAO) su tarea pa contribui na e mehoracion aki y DAO ta trahando duro pa logra esaki.
Staf y personal di DAO kier a felicita tur trahado riba nan Dia y ta invita nan pa reflexiona riba e dia aki riba e balor di cada un trahado su trabou pa nos comunidad. Pasobra finalmente tur labor tin su balor pa continuacion di nos economia y comunidad.