Home » Rapport Anual di A.T.A. pa 2022 a demostra un recuperacion turistico hopi mas fuerte cu a premira ora a crea e presupuesto di 2022.

Rapport Anual di A.T.A. pa 2022 a demostra un recuperacion turistico hopi mas fuerte cu a premira ora a crea e presupuesto di 2022.

by Admin
0 comment 104 views

 

Diamars dia 25 di april, 2023 a tuma luga e entrega oficial di e Rapport Anual pa aña 2022 na Minister di Turismo. Conforme e ley di A.T.A., tur aña tin 2 momento importante, e prome ta ora di entrega e Rapport Anual cu e resultadonan di e aña anterior y e di dos ta ora di haci entrega di e presupuesto pa e aña siguiente. Tur aña A.T.A. a sa di cumpli debidamente cu entrega di e Rapport Anual, incluyendo resumen di resultadonan y di trabao haci, como tambe e relato financiero cu su respectivo ‘goedkeurende verklaring.’ 

 

Despues cu minister ricibi y acorda esaki, e rapport ta wordo manda pa parlamento di Aruba ‘ter inzage’ pa 10 dia di trabao. Despues di pone disponibel na parlamento, Minister di Turismo por duna su aprobacion formal pa cu e Rapport Anual di A.T.A. 

Presupuesto 2022 y resultado 2022

E presupuesto pa 2022 a wordo entrega na october 2021, na momento cu ainda no tawata tin hopi claridad con e recuperacion turistico lo tawata pa 2022. Mirando bek mester bisa cu e recuperacion ta sumamente satisfactorio; a recupera casi completo qua  cantidad di bishitante, y mas importante ainda ta cu e entrada genera pa turismo tawata hopi mas cu na 2019. A.T.A. a pone como meta pa yega recuperacion di 95% pa e ultimo indicador aki den 2022 y a logra yega un recuperacion di 118% den Tourism Receipts na 2022 compara cu 2019.

 

Considerando e diferente retonan den e prome kwartaal di 2022, toch e mercado di Estados Unidos a logra crece su capacidad di asiento, yegando na un recuperacion completo compara cu 2019. Pa loke ta e industria crucero a tarda mas pa recupera, yegando na 73% di recuperacion compara cu 2019 den 2022. 

Pa loke ta e aspecto financiero, e entrada di A.T.A. tabata 16% mas compara cu locual a presupuesta, mientras cu a gasta 17% menos di locual a presupuesta entre otro pasobra a pone un pausa riba diferente actividadnan durante e prome kwartaal di 2022, unda cu Omicron a afecta biahe. 

 

Enfoke riba balans

Como parti di e recuperacion di 2022 a sigui enfoca esfuersonan riba e futuro di Aruba como destinacion, pa sigura un crecemento balanza y sostenible den e añanan nos dilanti. Esaki sigur ta un tarea cu por ta dificil, pero e ta un prioridad pa A.T.A., tanto riba nivel di “advocacy” como riba nivel di inversion. A.T.A. ta enfoca riba ‘duna di su banda’ pa Aruba por desaroya na un manera duradero. 

 

Reforma fiscal 2022

Aruba a introduci un reforma fiscal entrante e aña aki, y pa medio di esaki e.o., e costo di haci negoshi pa a aumenta pa medio di un aumento di BBO. Pero pa A.T.A. e reforma kiermen tambe cu a habri aña cu un porcion di e toeristenheffing di 7.1% na lugar di 9.5%., mientras cu e toeristenheffing a subi di 9.5% pa 12.5%. Den bista di e porcion mas abou cu A.T.A. ta ricibi, A.T.A. a prepara diferente amienda di e ley di A.T.A. cu ta importante pa mitiga risico di e cambio aki di e modelo di A.T.A. cu por haci e operacion di A.T.A. uno menos efectivo. E amienda a wordo entrega na Minister di Turismo. Despues di un aña fuerte y prome kwartaal di 2023 fuerte, mester sigui monitorea awor cu situacion lo por ta normalisando. 

 

E ekipo completo di A.T.A. ta wordo felicita pa nan trabao y pa e logro aki di por entrega un biaha mas un rapport cu un ‘goedkeurende verklaring’. Tambe ta gradici Hunta di Supervision, Grant Thornton y mas cu claro ta gradici Minister di Turismo pa e diligencia necesario cu lo ser duna na revision y aprobacion di e documento aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio