Recien, mi a bishita Butucu na San Nicolas, unda tin hopi tereno di cultivo disponibel cu ta aproba door di Parlamento di Aruba. Den e ROPV Ruimtelijk Ordeningsplan, tin diferente tereno disponibel pa agricultura y cria di bestia. Pa asina nos por yega na un pilar economico y industria nobo. Loke ta significa cu lo crea cupo pa trabou y tambe nos por yega na un calidad di cuminda mas halto, na un prijs rasonabel. Tin hopi hende den diferente generacion cu ta biba di agricultura y cria di bestia. Nos tin plan y inversionista cla pa inverti na Aruba. Tin expertonan internacional cu ta cla pa yuda prepara nos pais y educa nos hendenan pa por carga e industria nobo aki. Loke e ta rekeri ta pa e departamentonan gubernamental tin nan nanishi den mesun direccion, prepara y empodera pa por duna sosten y guia den e industria aki. Sigur esaki ta un bunita oportunidad pa Aruba. Nos tin cu ehecuta e plan awo, nos no por sinta warda e momento yega un biaha mas, pa nos wordo confronta cu ta hopi peligroso pa nos sigui depende di solamente un (1) pilar economico.