Horacio Oduber Hospital (HOH) a tene den fin di siman pa prome bes un open dag pa hobennan cu ta bay scol. Un open dag organisa pa e HOH-Academy unda e obhetivo tabata pa di e forma aki cera e generacion nobo conoci cu HOH y su trabounan y alabes fomenta interes den e hobennan pa sigui nan estudio den e ramo di cuido of un trabou cu ta aporta na cuido medico. Por mira bek riba dos mainta sumamente exitoso y bon bishita pa hoben compaña pa nan mayor super entusiasma cu e informacion ricibi. Mainta unda profesionalnan di HOH a duna informacion valioso na e hobennan y sigur mirando e exito lo no ta ultimo biaha cu ta y por organisa.
HOH- Academy a cuminsa cu e parti organisatorio algun luna pasa y a extende invitacion na diferente scol secundario pa muchanan cu tin interes pa sigui studia den e ramo di cuido medico registra pa atende e open dag. A sinta cu diferente departamento y asina a logra pone e plan den otro. A traha riba un “tour” den HOH bou guia di e profesionalnan di HOH-Academy y tambe a acerca diferente departamento pa nan traha riba booth di informacion special me bishitantenan
Sr. Gregory Croeze, director financiero a expresa su gratitud na e organisadornan cu a hinca cuerpo y alma pa haci e open dag aki uno exitoso, cual sigur no lo ta ultimo biaha. “Hopi bes hende tin e percepcion cu pa bo traha na hospital bo mester ta un nurse specialisa, asistente den camber di operacion of un specialista, pero realidad ta cu mas o menos 50% di e trahadonan di HOH ta den departamentonan cu ta brinda sosten na cuido”, asina Croeze ta splica. Akinan por pensa riba departamento di ICT, Departamento di Recurso Humano, tambe Medisch techniek cu ta encarga pa service aparatonan medico. Hopi importante tambe ta departamento di Voeding hunto cu dietistanan cu a duna splicacion di kico ta e cuminda y alimentacion necesario cu un pashent mester di dje y a haci uzo di e momento pa splica alimentacion en general.
E hoben studiante, Whitney Nin, tin aspiracion pa bira un neurologo. El a acudi na e open dag di HOH y el a haya esaki hopi leuk. E ta aprecia e oportunidad mirando cu el haya un bunita experiencia y hopi informacion cu e por uza den futuro.
Jacco Vroegop, director general di HOH, a comenta cu meta di e open dag aki ta pa entusiasma e muchanan pa scoge un profession den e sector di cuido. Pero specialmente pa scoge pa un trabou den HOH cu, manera Vroegop mes a menciona, ta e hospital di “mas leuk” den region. Un open dag di e tipo aki por ta posibel danki na personanan dedica cu bini riba nan dianan liber pa bin trabou y splica e muchanan tocante kico nan trabou ta encera. Na final, Vroegop a gradici tur cu a bihsita HOH y e team cu haci e dianan aki posibel.