Home » Homber cu a morde kita horea di pareha condena na 2 aña di prison

Homber cu a morde kita horea di pareha condena na 2 aña di prison

by Admin
0 comment 233 views

 

ORANJESTAD – Corte di Husticia a trata e caso penal cu Ministerio Publico a cuminsa contra e  homber Jonfy.V. Den sala di Corte tabata presente su mama y su ex pareha A.M., kende a bisa Hues cu el a bin pa scucha e caso pero no kier haci demanda di daño.

   ARUBA NATIVE por a compronde cu tabatin un pelea entre e pareha y cu J.V. a morde kita e orea di A.M.

MORDE KITA OREA

Hues a mustra cu e incidente aki a sosode na October 2022. El a puntra J.V. kico a sosode. Ta asina cu Fiscal ta acusa J.V. di maltrato severo y destruccion. J.V. a admiti di a morde e dama A.M. su orea afor. El a splica Hues cu e mester a defende su mes di e dama A.M., kende a bay riba dje cu un cuchiu. El a bisa Hues cu e tabatin nan yiu di 11 luna den su mannan. Segun J.V., el a kere cu el a morde A.M. na su cabez. Parce cu J.V. lo a corta A.M. na su pia. Ta asina cu ambos tabata bebi y a surgi un discusion. J.V. a coy e baby y  A.M. a coy e cuchiu y bay riba dje. Segun J.V. despues di a kita e cuchiu y el a tir’e un banda. Segun J.V., e dama A.M. a dal’e cu un palo den cabez.

Hues a bisa cu e dama A.M. a bisa Polis, cu J.V. y A.M. tabata den auto y despues a bin den cas caminda J.V. a dal’e y cort’e. Segun J.V. esey tabata durante defensa propio. E cellular di e dama A.M. lo a kibra.

A LOGRA PONE OREA BEK

Hues a bisa cu na Insam a constata cu a morde e orea di A.M. afor y a logra cose. Tambe cu A.M. tabatin un corta.

DEFENSA PROPIO

Hues a bisa cu J.V. ta papia di defensa propio. Hues a puntra J.V., pakico e no a core bay. El a splica cu e tabatin e baby den man y tin problema cu un pia. Pesey e mester a defende su mes.

J.V. a bisa Hues cu ta duel’e cu nan yiu a mira tur esaki.

FISCAL

Fiscal a bisa cu a keda legalmente proba cu J.V. a morde orea kita di A.M. Na opinion di Fiscal, aki no por papia di defensa propio. J.V. a kita e cuchiu for di A.M. y despues a morde su orea afor. Fiscal ta haya proba maltrato severo pasobra e victima ta keda cu un sicatriz. Tambe cu J.V. a corta A.M. na su pia. Esey ta maltrato cu arma y no defensa propio. Fiscal a sigui bisa cu e ta haya tambe proba, cu J.V. a kibra e celluar y bril di lesa di A.M. Fiscal a exigi 24 luna di prison di cual 6 luna ta condicional cu 2 aña prueba. Durante e periodo di prueba, J.V. lo mester ta bou guia di Reclasering.

ABOGADO

Abogado mr. Brito a bisa Hues cu no por prueba maltrato severo. E abogado a mustra cu e dama A.M. a dal J.V. cu boter y despues a coy un cuchiu y hink’e den lomba. E ta haya cu J.V. a actua den defensa propio. E abogado a bisa Hues cu J.V. a morde A.M. su orea afor pasobra A.M. tabata morde su duim y cu cuchiu den man. E abogado a bisa Hues cu J.V. a wordo ataca door A.M. cu cuchiu y J.V. cu su baby den man, mester a defende su mes. El a menciona sentencianan cu ta mustra con hende a wordo declara liber den situacion asina. E ta haya cu mester declara J.V. liber.

SENTENCIA

Hues a sera tratamento di e caso y a dicta sentencia di biaha. Hues a bisa cu tabatin discusion entre J.V. cu A.M. E mama di J.V. a bisa cu el a mira J.V. dal A.M. den auto y despues cos a sigui den cas. Hues a bisa cu e pregunta ta si J.V. a actua den defensa propio. E dama A.M. a pasa man pa un cuchiu y bay riba J.V. y J.V. a kita e cuchiu. Hues ta haya cu e momento ey e peliger a pasa. Despues J.V. a corta A.M. na pia.

Na opinion di Hues, for di e momento cu J.V. a kita e cuchiu, no por papia mas di defensa propio. Esey ta conta tambe pa e mordemento di orea afor. Hues no ta haya cu por papia aki di defensa propio.

E ta haya legalmente proba cu J.V. a haci maltrato severo, maltrato cu arma y kibra cellular di A.M. Hues a bisa cu ta di ambos banda tabatin di violencia.

Pa cu e castigo, e ta tene cuenta cu esaki. Hues a bisa cu e ta comparti e punto di bista di J.V. cu ta sumamente fastioso cu e mucha a mira tur cos. El a tene cuenta cu nan tin un yiu y lo keda den contacto cu otro.

Hues a condena J.V. na 24 luna di prison di cual 12 luna condicional cu 2 aña di prueba. Hues a bisa cu durante e periodo di prueba, J.V. lo cay bou guia di Reclasering.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio